ក្រុមមនុស្សធម៌របស់អង្គការសហប្រជាជាតិ បាននិយាយថា ដោយប្រជាជនស៊ីវិលជិតពាក់កណ្តាលស្រេកឃ្លានធ្ងន់ធ្ងរ យុទ្ធនាការទម្លាក់គ្រាប់បែកនៅប្រទេសយេម៉ែន កំពុងធ្វើឱ្យស្ថានភាពកាន់តែអាក្រក់មិនគួរឱ្យជឿ។ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយនៅក្នុងសេចក្តីប្រកាសព័ត៌មានថា «បន្ទាប់ពីវិបត្តិ និងជម្លោះ រយៈពេលជាងមួយទសវត្សរ៍ មនុស្សជាង១៩លាននាក់នៅតែត្រូវការជំនួយសំខាន់ៗ រួមមានអាហារ អាហារូបត្ថម្ភ ការថែទាំសុខភាព ទីជម្រក និងទឹកស្អាត»។

អង្គការ OCHA បាននិយាយថា ការវាយប្រហារតាមអាកាសកាលពីខែមុន ដែលតាមសេចក្តីរាយការណ៍ថាបានសម្លាប់មនុស្ស៤នាក់ និងជាង២០នាក់រងរបួស បានធ្វើឱ្យស្ថានភាពដ៏ផុយស្រួយកាន់តែស្មុគស្មាញ។ ការិយាល័យនេះបាននិយាយថា ការវាយប្រហារទាំងនេះ ក៏ត្រូវបានរាយការណ៍ថា មានផលប៉ះពាល់ធ្ងន់ធ្ងរដល់សហគមន៍។ 

អង្គការ OCHA បាននិយាយថា អង្គការមនុស្សធម៌កំពុងចូលទៅដល់សហគមន៍ងាយរងគ្រោះនៅទូទាំងប្រទេស សូម្បីតែនៅក្នុងស្ថានភាពបច្ចុប្បន្នក៏ដោយ។ រហូតមកដល់ពេលនេះ ដៃគូរនានាបានផ្តួចផ្តើមការចែកចាយជំនួយស្បៀងអាហារ ដែលផ្តោតលើមនុស្សជិត៦លាននាក់។ ដៃគូនានា បានគាំទ្រដល់មណ្ឌលសុខភាពជាង៥០០កន្លែង ដោយបានផ្តល់សេវាសុខភាពបឋម និងមធ្យមសម្រាប់ការសង្គ្រោះជីវិតដល់មនុស្សប្រមាណ ២២៥.០០០នាក់។

អង្គារ OCHA បាននិយាយថា តម្រូវការកំពុងកើនឡើង ហើយមូលនិធិកំពុងធ្លាក់ចុះ។ ការអំពាវនាវផ្នែកមនុស្សធម៌នៅឆ្នាំនេះសម្រាប់ប្រទេសយេម៉ែនត្រូវការ២,៥ពាន់លានដុល្លារអាមេរិក ដោយទទួលមូលនិធិត្រឹមតែ១៧៣លានដុល្លារប៉ុណ្ណោះ។