យោធាឥណ្ឌូនេស៊ី បានបញ្ជូនកងរក្សាសន្តិភាពចំនួន ១.០៩០នាក់ កាលពីថ្ងៃពុធ ដើម្បីបម្រើក្នុងកងកម្លាំងបណ្តោះអាសន្នរបស់អង្គការសហប្រជាជាតិ នៅក្នុងប្រទេសលីបង់(UNIFIL) ដែលឥណ្ឌូនេស៊ី គឺជាប្រទេសដែលរួមចំណែកដល់កងទ័ពដ៏សំខាន់។

ឥណ្ឌូនេស៊ី បានរួមចំណែកកងទ័ពដល់ UNIFIL ចាប់តាំងពីឆ្នាំ ២០០៦ បន្ទាប់ពីអាណត្តិនៃប្រតិបត្តិការនេះ ត្រូវបានពង្រីកដោយក្រុមប្រឹក្សាសន្តិសុខអង្គការសហប្រជាជាតិ បន្ទាប់ពីសង្គ្រាមលីបង់លើកទី២ ដើម្បីជួយកងទ័ពលីបង់រក្សាការគ្រប់គ្រងលើភាគខាងត្បូងនៃប្រទេស ដែលមានព្រំប្រទល់ជាប់នឹងអ៊ីស្រាអែល។

ទាហានឥណ្ឌូនេស៊ីក្រុមថ្មី នឹងជំនួសក្រុមបច្ចុប្បន្នដែលកំពុងបម្រើការក្នុងអង្គភាព Garuda Contingent ដែលមានបុគ្គលិកចំនួន ១.២៣០ នាក់ ហើយលក្ខខណ្ឌរបស់ពួកគេ នឹងផុតកំណត់ នៅចុងខែមេសានេះ។

លោកឧត្តមសេនីយ៍ Agus Subiyanto អគ្គមេបញ្ជាការកងកំលាំងប្រដាប់អាវុធឥណ្ឌូនេស៊ី បាននិយាយនៅក្នុងសន្និសីទសារព័ត៌មាន មុនចេញដំណើរ នៅទីក្រុងហ្សាការតាថា៖«ថ្ងៃនេះ ខ្ញុំមានមោទនភាពយ៉ាងខ្លាំង ក្នុងការបញ្ជូនទាហានឥណ្ឌូនេស៊ីចំនួន ១.០៩០នាក់ ទៅចូលរួមក្នុងអង្គភាព Garuda Contingent ដែលបំពេញកាតព្វកិច្ច ក្នុងបេសកកម្ម UNIFIL នៅប្រទេសលីបង់»។

«ការជឿទុកចិត្តដែលអង្គការសហប្រជាជាតិ បានផ្តល់ដល់ប្រទេសឥណ្ឌូនេស៊ី ក្នុងការបន្តបញ្ជូនកងកម្លាំងសម្រាប់ប្រតិបត្តិការរក្សាសន្តិភាពរបស់ខ្លួន គឺជាភ័ស្តុតាងដែលបង្ហាញថា ពិភពលោកទទួលស្គាល់វិជ្ជាជីវៈ វិន័យ និងការលះបង់របស់កងកម្លាំងប្រដាប់អាវុធឥណ្ឌូនេស៊ី»។

គិតត្រឹមខែធ្នូ ឆ្នាំ ២០២៤ កម្លាំងរបស់ UNIFIL មានកងកម្លាំងរក្សាសន្តិភាពចំនួន ១០.២៥១ នាក់មកពីប្រទេសចំនួន ៤៨ ដែលមានការចូលរួមចំណែកដោយកងទ័ព ដោយប្រទេសឥណ្ឌូនេស៊ី ឈរនៅលើកំពូលតារាង បន្ទាប់មក គឺប្រទេសអ៊ីតាលី និងឥណ្ឌា។