ប្រធានបុគ្គលិករបស់ចារកម្មជាន់ខ្ពស់សហរដ្ឋអាមេរិក កាលពីថ្ងៃពុធ (០៩ មេសា) បាននិយាយថា សហគមន៍ស៊ើបការណ៍ចារកម្មសម្ងាត់ កំពុងស៊ើបអង្កេតថាតើអង្គភាព FBI មានជាប់ពាក់ព័ន្ធក្នុងការរៀបចំផែនការវាយប្រហារដោយកុបកម្មនៅថ្ងៃទី០៦ ខែមករា ឆ្នាំ២០២១ លើវិមានកាពីតូល ពីហ្វូងអ្នកគាំទ្រលោកប្រធានាធិបតី Donald Trump ដែរឬទេ។

ក្នុងអំឡុងពេលសវនាការព្រឹទ្ធសភាស្តីពីការតែងតាំងឱ្យធ្វើជាប្រធានមជ្ឈមណ្ឌលប្រឆាំងភេរវកម្មជាតិអាមេរិក លោក Joseph Kent បាននិយាយថា "ឥឡូវនេះ ក្រុមការងារកំពុងត្រួតពិនិត្យជុំវិញបញ្ហានេះ"។ លោកមិនបានបញ្ជាក់លម្អិតទេថា តើអង្គភាពស៊ើបការណ៍សម្ងាត់របស់អាមេរិកទាំង១៨ មួយណាកំពុងធ្វើការស៊ើបអង្កេតនោះ។

របាយការណ៍ពីអង្គភាពឃ្លាំមើលរបស់ក្រសួងយុត្តិធម៌អាមេរិក ដែលចេញផ្សាយនៅខែធ្នូ បានបដិសេធការអះអាងដោយក្រុមស្តាំនិយមជ្រុល ដែលចោទថា ប្រតិបត្តិករ FBI ពាក់ព័ន្ធដោយសម្ងាត់ក្នុងការវាយប្រហារវិមានកាពីតូលនោះ។ របាយការណ៍រកឃើញថា មានអ្នកលួចផ្តល់ព័ត៌មាន FBI ចំនួន ២៦នាក់ នៅទីក្រុងវ៉ាស៊ីនតោន ក្នុងថ្ងៃវាយប្រហារពិតមែន ប៉ុន្តែ FBI មិនបានអនុញ្ញាតឱ្យអ្នកណាម្នាក់ចូលទៅវិមានកាពីតូល ឬចូលរួមក្នុងអំពើហិង្សាទេ។

គួរឱ្យដឹងថា ភាពតានតឹងនៅពេលនោះកើតឡើងដោយសារលោក Trump បានអះអាងដោយមិនពិតថា មានការក្លែងបន្លំក្នុងការបោះឆ្នោតប្រធានាធិបតីឆ្នាំ២០២០ ដែលលោកបានចាញ់។ នៅក្នុងខែមករា ឆ្នាំ២០២៥នេះ លោកបានលើកលែងទោសដល់ជនជាប់ចោទជាង ១.៥០០នាក់ នៅក្នុងការវាយប្រហារដោយហ្វូងអ្នកគាំទ្ររបស់លោក ដែលសម្រុកចូលវិមានកាពីតូល ក្នុងកិច្ចខិតខំប្រឹងប្រែងដែលមិនជោគជ័យ ដើម្បីបង្វែរលទ្ធផលឆ្នោតនៅពេលនោះ៕