ក្រុមអាជីវករ និងប្រមុខសមាគមពាណិជ្ជកម្មអេឡិចត្រូនិកដ៏ធំបំផុតរបស់ប្រទេសចិន បាននិយាយថា បណ្ដាក្រុមហ៊ុនចិន ដែលលក់ផលិតផលនៅលើបណ្ដាញលក់ទំនិញ Amazon ដ៏ធំ កំពុងរៀបចំឡើងថ្លៃសម្រាប់អ្នកទិញនៅសហរដ្ឋអាមេរិក ឬចាកចេញពីទីផ្សារនោះ ដោយសារតែការដំឡើងពន្ធមិនធ្លាប់មានពីមុនមករបស់លោកប្រធានាធិបតី Donald Trump។

លោក Trump កាលពីថ្ងៃពុធ បានប្រកាសដំឡើងពន្ធលើការនាំចូលរបស់ចិន ដល់ ១២៥% ពីកម្រិត ១០៤% រួចទៅហើយ ខណៈចិន សងសឹកដោយការយកពន្ធ ៨៤% លើទំនិញអាមេរិកវិញ ដែលបង្កើនការប្រឈមមុខដាក់គ្នាយ៉ាងគ្រោះថ្នាក់រវាងប្រទេសសេដ្ឋកិច្ចធំជាងគេលើពិភពលោកទាំងពីរ។

លោកស្រី Wang Xin ប្រធានសមាគមពាណិជ្ជកម្មអេឡិចត្រូនិកឆ្លងព្រំដែន ស៊ិនជិន ដែលតំណាងឱ្យអ្នកលក់នៅលើបណ្ដាញ Amazon ជាង ៣.០០០នាក់ បាននិយាយនៅថ្ងៃព្រហស្បតិ៍ (១០ មេសា) នេះថា "នេះមិនមែនគ្រាន់តែជាបញ្ហាពន្ធប៉ុណ្ណោះទេ តែគឺជារចនាសម្ព័ន្ធនៃការចំណាយទាំងមូល"។ លោកស្រីបន្ថែមថា "ពេលនេះ អ្នកលក់មួយចំនួនកំពុងបង្កើនតម្លៃនៅសហរដ្ឋអាមេរិក ខណៈអ្នកផ្សេងទៀតកំពុងស្វែងរកទីផ្សារថ្មី"។

ប្រទេសចិន មានអ្នកលក់នៅលើបណ្ដាញ Amazon ប្រហែលពាក់កណ្តាល ជាមួយនឹងអាជីវកម្ម Amazon ជាង ១០០.០០០កន្លែង បានចុះបញ្ជីនៅក្នុងទីក្រុង ស៊ិនជិន ភាគខាងត្បូងរបស់ចិន ដែលបង្កើតប្រាក់ចំណូលប្រចាំឆ្នាំចំនួន ៣៥,៣ពាន់លានដុល្លារ នេះបើយោងតាមស្ថាប័នផ្តល់សេវាពាណិជ្ជកម្មអេឡិចត្រូនិក SmartScout ៕