ក្រុមហ៊ុនអាមេរិកជាច្រើន បានរួសរាន់នាំទំនិញចូល ដើម្បីគេចពីអត្រាពន្ធគំរាមជាច្រើនរបស់ប្រធានាធិបតី លោក Donald Trump ដែលការនាំចូលបានកើនឡើងជិតដល់កម្រិតខ្ពស់បំផុត ក្នុងប៉ុន្មានសប្តាហ៍ថ្មីៗនេះ។ ហើយឥឡូវនេះ ក្រុមហ៊ុនលក់រាយ និងនាំចូលផ្សេងទៀត កំពុងនៅស្ងៀម ដោយរង់ចាំភាពច្បាស់លាស់ថា តើកាតព្វកិច្ចពន្ធថ្មី នឹងត្រូវបានដាក់នៅទៅណាខ្លះ។

Vizion ដែលជាក្រុមហ៊ុនផ្ដល់កម្មវិធីតាមដានការដឹកជញ្ជូនតាមកុងតឺន័រ បានឲ្យដឹងថា ការកក់ការនាំចូលរបស់សហរដ្ឋអាមេរិក ចំពោះនាវាកុងតឺន័រធំៗ បានធ្លាក់ចុះ ៦៤ភាគរយ ពីចន្លោះថ្ងៃទី២៤ ដល់ថ្ងៃទី៣១ ខែមីនា រហូតដល់ចន្លោះថ្ងៃទី១ និងទី៨ ខែមេសា ជាសប្តាហ៍ដែលលោក Trump បានប្រកាសពន្ធ «បដិការ» លើប្រទេសមួយចំនួន។

នាយកប្រតិបត្តិនៃក្រុមហ៊ុនលក់រាយ និងដឹកជញ្ជូន បានលើកឡើងថា ការណ៍ដែលម្ដងមាន និងម្ដងអត់ សម្រាប់ពន្ធគំរាមរបស់លោក Trump ក្នុងនោះរួមមានទាំងការផ្អាកកាលពីថ្ងៃទី៩ ខែមេសា ចំពោះអត្រាពន្ធដែលទើបដាក់ថ្មី ដោយមិនរាប់បញ្ចូលប្រទេសចិននោះ កំពុងធ្វើឲ្យដំណើរការពាណិជ្ជកម្មមិនរលូន។

ក្រុមហ៊ុនលក់រាយ ដែលជាធម្មតានឹងរៀបចំផែនការសម្រាប់ថ្ងៃឈប់សម្រាករដូវរងាដ៏ធំនោះ មិនបានបញ្ជាទិញជាធម្មតារបស់ពួកគេទៀតឡើយ សម្រាប់ការតុបតែងបុណ្យណូអែលពីរោងចក្រចិន។ ក្រុមហ៊ុន Amazon ត្រូវបានគេរាយការណ៍ថា បានលុបចោលការបញ្ជាទិញរដូវក្ដៅមួយចំនួនពីអាស៊ី។ 

លោក Trump កាលពីថ្ងៃទី៩ ខែមេសា បានដាក់ការផ្អាករយៈពេល ៩០ថ្ងៃលើការប្រមូលពន្ធ «បដិការ» របស់លោក ពោលគឺមិនដល់ ២៤ម៉ោងផង ក្រោយវិធានការនោះត្រូវបានដាក់ចេញ។ ប៉ុន្តែនៅក្នុងការបង្ហាញពីយុទ្ធសាស្ត្រ លោកបានដំឡើងពន្ធលើទំនិញផលិតដោយប្រទេសចិនពី ១០៤ភាគរយទៅ ១២៥ភាគរយ ដែលជាការបង្កើនការរបតគ្នាទៅវិញទៅមក រវាងប្រទេសនាំចូលដ៏ធំបំផុតរបស់ពិភពលោក និងប្រទេសនាំចេញដ៏ធំបំផុតរបស់ពិភពលោកដែលមានទីផ្សារហិរញ្ញវត្ថុសកល៕