ទំនុកចិត្តលើសេដ្ឋកិច្ចអាមេរិក កំពុងធ្លាក់ចុះ ខណៈដែលវិនិយោគិន បានលក់បណ្ណបំណុលរដ្ឋាភិបាល ដោយសារមានក្ដីបារម្ភកាន់តែខ្លាំងឡើងៗ ជុំវិញផលប៉ះពាល់ពីវិធានការពន្ធគយរបស់លោក Donald Trump។

រដ្ឋាភិបាលជាច្រើន លក់បណ្ណបំណុល ជាពិសេសបណ្ណបំណុល IOU (ខ្ញុំខ្ចីអ្នក) ដើម្បីរៃអង្គាសប្រាក់ពីទីផ្សារហិរញ្ញវត្ថុ សម្រាប់ការចំណាយសាធារណៈ ហើយពួកគេបង់ការប្រាក់ត្រលប់វិញ។ ជាធម្មតា សហរដ្ឋអាមេរិកមិនប្រឈមជាមួយអត្រាការប្រាក់ខ្ពស់លើបំណុលឡើយ ដោយសារមូលបត្របំណុលរបស់ខ្លួនត្រូវបានចាត់ទុកថា ជាការវិនិយោគប្រកបដោយសុវត្ថិភាព ប៉ុន្តែកាលពីថ្ងៃពុធ (ទី៩ ខែមេសា) អត្រាការប្រាក់បានឡើងយ៉ាងខ្លាំងដល់ទៅ ៤,៥ភាគរយ។

ការកើនឡើងនេះ បានកើតមានឡើងបន្ទាប់ពីលោក Trump បានបន្តវិធានការដំឡើងពន្ធគយលើទំនិញនានា ដែលត្រូវបាននាំចូលសហរដ្ឋអាមេរិក ខណៈដែលសង្រ្គាមពាណិជ្ជកម្មរបស់ទីក្រុងវ៉ាស៊ីនតោនជាមួយប្រទេសចិន បានឡើងកម្ដៅបន្ថែមទៀត ទោះបីជាលោក Trump នៅថ្ងៃពុធនោះ បានផ្អាករយៈពេល ៩០ថ្ងៃ ចំពោះអត្រាពន្ធខ្ពស់ សម្រាប់ប្រទេសមួយចំនួនក៏ដោយ។

បន្ទាប់ពីសហរដ្ឋអាមេរិកបានអនុវត្តអត្រាពន្ធ ១០៤ភាគរយលើផលិតផលពីប្រទេសចិន នៅពាក់កណ្តាលអធ្រាត្រកាលពីថ្ងៃពុធ ទីក្រុងប៉េកាំងបានវាយបកវិញជាមួយនឹងកម្រិត ៨៤ភាករយលើផលិតផលអាមេរិក។ ក្រោយមក Trump បានដំឡើងពន្ធលើប្រទេសចិនដល់ ១២៥ភាគរយ។

តែទោះជាយ៉ាងណាក៏ដោយ ជារួម ការលក់មូលបត្របំណុល នៅសហរដ្ឋអាមេរិក បង្កជាបញ្ហាធំដ៏ប្រទេសដែលមានសេដ្ឋកិច្ចដ៏ធំបំផុតរបស់ពិភពលោកមួយនេះ៕