នាយករដ្ឋមន្រ្តីថៃលោកស្រី Paetongtarn Shinawatra និយាយនៅថ្ងៃព្រហស្បតិ៍នេះថា នឹងមានពេលវេលាបន្ថែមទៀត ដើម្បីកែលម្អផែនការរបស់ពួកគេ មុនពេលចរចាជាមួយរដ្ឋាភិបាលសហរដ្ឋអាមេរិក ក្រោយលោកប្រធានាធិបតី Donald Trump និយាយថា លោកនឹងផ្អាកបណ្តោះអាសន្នពន្ធដែលលោកដាក់លើប្រទេសជាច្រើន លើកលែងប្រទេសចិនមួយ ។

រដ្ឋមន្រ្តីហិរញ្ញវត្ថុថៃលោក Pichai Chunhavajira និយាយនៅថ្ងៃព្រហស្បតិ៍នេះថា ថៃបានរៀបចំការជំរុញសេដ្ឋកិច្ចបន្ថែមទៀត ផ្តោតសំខាន់លើការបង្កើតការងារ ហើយការផ្អាកពន្ធសហរដ្ឋអាមេរិករយៈពេល ៩០ថ្ងៃដែលត្រូវបានប្រកាសកាលពីយប់កន្លងទៅ នឹងផ្តល់ពេលវេលាបន្ថែមទៀតដល់ក្រុមមន្រ្តី ដើម្បីរៀបចំការឆ្លើយតប ។

យោងតាមការលើកឡើងរបស់លោក Pichai បានឲ្យដឹងថា ពន្ធរបស់លោក Trump រួមទាំងពន្ធ ៣៦ភាគរយលើការនាំចេញរបស់ថៃទៅកាន់សហរដ្ឋអាមេរិក ។ ការធ្លាក់ចុះការនាំចេញនឹងធ្វើឲ្យប៉ះពាល់ដល់ខ្សែសង្វាក់ផលិតកម្ម និងការងារ ដូច្នេះហើយវិធានការកាត់បន្ថយហានិភ័យ ត្រូវបានរៀបចំឡើង ។

ថៃនិយាយថា ពួកគេនឹងបង្កើនការនាំចូលពីសហរដ្ឋអាមេរិក ហើយនិងបន្ទាបតម្លៃពន្ធ ពេលដែលពួកគេព្យាយាមចរចាលើកិច្ចព្រមព្រៀងល្អប្រសើរជាងនេះជាមួយអាមេរិក ៕