ក្រុមអភិរក្សនិយមរបស់ប្រទេសអាល្លឺម៉ង់ ក្រោមការដឹកនាំរបស់លោក Friedrich Merz បានឈានដល់កិច្ចព្រមព្រៀងជាមួយគណបក្សប្រជាធិបតេយ្យសង្គម ដើម្បីកាច់ចង្កូតប្រទេសដែលមានសេដ្ឋកិច្ចដ៏ធំបំផុតរបស់អឺរ៉ុប ដោយការព្រមព្រៀងនេះ កើតមានឡើងក្រោយរយៈ ៥ខែបន្ទាប់ពីរដ្ឋាភិបាលមុនបានដួលរលំ។

លោក Merz វ័យ ៦៩ឆ្នាំ បាននិយាយថា កិច្ចព្រមព្រៀងរបស់គណបក្សលោក ជាមួយនឹងដៃគូរបស់លោក បានបញ្ជូន «សញ្ញាដ៏រឹងមាំ និងច្បាស់លាស់» ដល់ប្រជាជនអាល្លឺម៉ង់ និងសហភាពអឺរ៉ុប (EU) ដែលថា ពួកគេនឹងទទួលបាន «រដ្ឋាភិបាលដ៏រឹងមាំដែលមានសមត្ថភាពធ្វើសកម្មភាព»។

ប្រទេសអាល្លឺម៉ង់ បានមាននូវឱនភាពសេដ្ឋកិច្ចរួចទៅហើយ មុនពេលដែលប្រទេសនេះ ទទួលរងនូវភាពចលាចលផ្នែកសេដ្ឋកិច្ចដែលបណ្តាលមកពីពន្ធគយពាណិជ្ជកម្មរបស់ប្រធានាធិបតីអាមេរិក Donald Trump។

អមដោយការសន្យាថា នឹងបំពេញតាមការប្តេជ្ញាចិត្តផ្នែកការពារជាតិ និងធ្វើឲ្យការប្រកួតប្រជែងសេដ្ឋកិច្ចមានសន្ទុះឡើងវិញនោះ ឥស្សរជនដែលកំពុងរង់ចាំកាន់តំណែងអធិការបតីបាននិយាយថា៖ «សារដ៏សំខាន់ផ្ញើទៅកាន់លោក Donald Trump គឺថា ប្រទេសអាល្លឺម៉ង់បានវិលមកកាន់ផ្លូវត្រូវវិញហើយ»។

យ៉ាងណាក្ដី លោក Merz និងដៃគូព្រមព្រៀងបង្កើតរដ្ឋាភិបាលចម្រុះរបស់លោក បាននិងកំពុងស្ថិតនៅក្រោមសម្ពាធយ៉ាងខ្លាំងក្លា ក្នុងការបញ្ចប់ភាពកម្សោយខាងនយោបាយរបស់ប្រទេសអាល្លឺម៉ង់ ចាប់តាំងពីគណបក្សប្រជាធិបតេយ្យគ្រិស្តសាសនារបស់លោក បានឈ្នះការបោះឆ្នោតសហព័ន្ធ នៅក្នុងខែកុម្ភៈ។

រូបលោកក៏ទើបតែបានឃើញផងដែរថា នៅក្នុងការស្ទង់មតិ ការគាំទ្រ ចំពោះគណបក្សរបស់លោក ស្ថិតនៅពីក្រោមក្រុមស្តាំនិយមជ្រុល ដែលប្រឆាំងអន្តោប្រវេសន៍ គឺគណបក្សជម្រើសផ្សេងសម្រាប់អាល្លឺម៉ង់ (AfD)។ ដោយប្រកាសពីកិច្ចព្រមព្រៀងបង្កើតរដ្ឋាភិបាល លោក Merz បានសន្យាថា នឹងធ្វើកំណែទម្រង់ និងធ្វើឲ្យអាល្លឺម៉ង់មានស្ថិរភាព ដោយផ្តោតលើអន្តោប្រវេសន៍ សេដ្ឋកិច្ច និងការពារជាតិ៕