ប្រទេសចិននៅថ្ងៃព្រហស្បតិ៍នេះ បានព្រមានភាគីក្នុងសង្គ្រាមអ៊ុយក្រែន ប្រឆាំងនឹងការធ្វើ «ការថ្លែងមិនទទួលខុសត្រូវ»បន្ទាប់ពីលោកប្រធានាធិបតី វ្ល៉ឌីមី ហ្សេឡិនស្គី ( Volodymyr Zelensky) បាននិយាយថា ទីក្រុងប៉េកាំងដឹងថា ពលរដ្ឋរបស់ខ្លួន កំពុងត្រូវបានជ្រើសរើសដោយរុស្ស៊ី ដើម្បីប្រយុទ្ធក្នុងជម្លោះ  នេះ។

លោក ហ្សេឡិនស្គី បាននិយាយកាលពីថ្ងៃពុធថា ទីក្រុងគីវ មានព័ត៌មានលម្អិតអំពីជនជាតិចិនចំនួន ១៥៥នាក់ ដែលត្រូវបានដាក់ពង្រាយ ដើម្បីជួយដល់ការលុកលុយរបស់ទីក្រុងមូស្គូ មួយថ្ងៃបន្ទាប់ពីបានអះអាងថា កងទ័ពអ៊ុយក្រែន បានចាប់ខ្លួនទាហានចិន ពីរនាក់ នៅក្នុងតំបន់ Donetsk ភាគខាងកើត។

នៅពេលសួរអំពីការអះអាងរបស់លោក ហ្សេឡិនស្គី នៅថ្ងៃព្រហស្បតិ៍នេះ ក្រសួងការបរទេសរបស់ទីក្រុងប៉េកាំង បានប្រាប់ «ភាគីពាក់ព័ន្ធ»ឲ្យជៀសវាងពីការធ្វើការអត្ថាធិប្បាយដែលគ្មានការទទួលខុសត្រូវបែបនេះ»។

អ្នកនាំពាក្យក្រសួងការបរទេសលោក Lin Jian បាននិយាយនៅក្នុងសន្និសីទសារព័ត៌មានជាទៀងទាត់ថា៖«យើងនឹងណែនាំភាគីពាក់ព័ន្ធឲ្យទទួលស្គាល់តួនាទីរបស់ប្រទេសចិន ឲ្យបានត្រឹមត្រូវ និងច្បាស់លាស់» ។

ប្រទេសចិន បានបង្ហាញពីខ្លួនឯងថា ជាភាគីអព្យាក្រឹត នៅក្នុងសង្គ្រាមរយៈពេល ៣ ឆ្នាំដ៏ជូរចត់នេះ បើទោះបីជាមានការរិះគន់ពីរដ្ឋាភិបាលលោកខាងលិចថា ទំនាក់ទំនងជិតស្និទ្ធរបស់ខ្លួនជាមួយរុស្ស៊ី បានផ្តល់ការគាំទ្រផ្នែកសេដ្ឋកិច្ច និងការទូតយ៉ាងសំខាន់ដល់ទីក្រុងមូស្គូក៏ដោយ ដោយមិនបានលើកឡើងពីអ៊ុយក្រែន ឬលោក ហ្សេឡិនស្គីទេ។