WHO៖ អង្គការសុខភាពពិភពលោកបាននិយាយកាលពីថ្ងៃសុក្រថា វីរុសបម្លែងខ្លួនថ្មី Omicron នៃវីរុស COVID-19 ពេលនេះត្រូវបានរកឃើញនៅក្នុងប្រទេសចំនួន ៣៨ ជុំវិញពិភពលោក។ អ្នកដឹកនាំបច្ចេកទេសរបស់អង្គការសុខភាពពិភពលោកសម្រាប់ជំងឺកូវីដ-១៩ លោកស្រី Maria Van Kerkhove បាននិយាយអំពីការកើនឡើងវីរុសបម្លែងខ្លួនថ្មី Omicron រាលដាលមកពីប្រទេសអាហ្វ្រិកខាងត្បូងថា បានរាលដាលចូលទៅក្នុងបណ្តាប្រទេសចំនួន ៣៨។
លោកស្រី Van Kerkhove បាននិយាយថា មានរបាយការណ៍នៃអ្នកឆ្លងវីរុស Omicron ស្ថិតក្នុងភាពធ្ងន់ធ្ងរ។ លោកស្រីនិយាយថា ករណីដំបូងគឺមកពីក្រុមនិស្សិតសាកលវិទ្យាល័យដែលបង្ហាញរោគសញ្ញាស្រាល។ លោកវេជ្ជបណ្ឌិត Michael Ryan ប្រធានផ្នែកសង្គ្រោះបន្ទាន់នៅអង្គការសុខភាពពិភពលោកនិយាយថា វាជារឿងសំខាន់ដែលត្រូវប្រុងប្រយ័ត្ននៅពេលនិយាយសំដៅ ទៅលើករណីឆ្លងវីរុសមានស្ថានភាពស្រាល។ លោកនិយាយថា ការពិតដែលភាគច្រើននៃករណីស្ថិតក្នុងស្ថានភាពស្រាលគឺបង្ហាញថា វារាលដាលក្នុងចំណោមមនុស្សវ័យក្មេងដែលមានសុខភាពល្អ។ វីរុសបម្លែងខ្លួនថ្មីត្រូវបានរកឃើញកាលពីជាងមួយសប្តាហ៍មុន ដោយអ្នកវិទ្យាសាស្ត្រនៅប្រទេសអាហ្វ្រិកខាងត្បូង និងបុតស្វាណា។
ជាមួយគ្នានេះ មន្ត្រីអង្គការសុខភាពពិភពលោកនៅតំបន់ប៉ាស៊ីហ្វិកខាងលិច បាននិយាយកាលពីថ្ងៃសុក្រថា ការបិទព្រំដែនដែលបានអនុម័តដោយបណ្តាប្រទេសមួយចំនួន អាចចំណាយពេលវេលាក្នុងការដោះស្រាយជាមួយវីរុសបម្លែងខ្លួនថ្មី Omicron ប៉ុន្តែវិធានការដែលបានដាក់ឱ្យដំណើរការ និងបទពិសោធន៍ដែលទទួលបានក្នុងការដោះស្រាយជាមួយវីរុសបម្លែងខ្លួន Delta នៅតែជាមូលដ្ឋានគ្រឹះសម្រាប់ការប្រយុទ្ធប្រឆាំងទៅនឹងវីរុសឆ្លង៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
