រដូវវស្សាដែលបានចាប់ផ្តើមនៅប្រទេសបូលីវីកាលពីខែវិច្ឆិកាឆ្នាំមុន បានបង្កឲ្យមានការជន់លិចធ្ងន់ធ្ងរនៅតំបន់ភាគឦសាន Beni ធ្វើឲ្យខូចខាតផ្ទះសម្បែង និងដំណាំរបស់ប្រជាពលរដ្ឋ ហើយនិងធ្វើឲ្យស្ថានភាពរស់នៅរបស់ពួកគេកាន់តែជួបការលំបាកខ្លាំង ។

ប្រទេសនៅអាមេរិកខាងត្បូងមួយនេះ រងការវាយប្រហារដោយភ្លៀងធ្លាក់ខ្លាំងបំផុតក្នុងរយៈពេលជាច្រើនទសវត្សរ៍កន្លងមកនេះ ធ្វើឲ្យស្រែចម្ការ និងកសិដ្ឋានចិញ្ចឹមសត្វ រងការជន់លិច ធ្វើឲ្យមានហានិភ័យដល់ការនាំចេញទៅកាន់ទីផ្សារក្រៅប្រទេស និងជំរុញឲ្យតម្លៃស្បៀងអាហារក្នុងស្រុក ហក់ឡើងខ្ពស់ ។

នៅតាមទីក្រុងជាច្រើន ដូចជាទីក្រុង Puerto Almacen និងទីក្រុង Puerto Ballivian គ្រួសារទាំងមូល បានបោះបង់ចោលផ្ទះសម្បែងរបស់ពួកគេ និងស្វែងរកទីជម្រកបណ្តោះអាសន្ននៅតាមផ្លូវ ។

អ្នកស្រី Mayra Peralta គឺជាជនរងគ្រោះមួយរូប ដោយសារទឹកជំនន់ និយាយថា ពួកយើងបង្ខំចិត្តចាកចេញពីផ្ទះសម្បែងរបស់ពួកយើង ។ ជារៀងរាល់ថ្ងៃ ទឹកបានឡើងជាបន្តបន្ទាប់ ។

នៅទីក្រុង Loma Calatayud កសិករ Jesus Martinez បង្ហាញវាលស្រែរបស់លោករងការជន់លិច ហើយដំណាំដំឡូងមីរបស់លោក ខូចខាតគ្មានសេសសល់ ។ 

ទឹកជំនន់បូលីវីនៅរដូវវស្សានេះ បានធ្វើឲ្យប៉ះពាល់ដល់ប្រជាពលរដ្ឋ ៥៩ម៉ឺននាក់ និងបានសម្លាប់មនុស្សយ៉ាងហោច ៥៥នាក់ ។

យោងតាមការអះអាងរបស់ក្រុមអ្នកជំនាញ បានឲ្យដឹងថា បម្រែបម្រួលអាកាសធាតុបានធ្វើឲ្យផ្លាស់ប្តូរលក្ខខណ្ឌអាកាសធាតុ ជួនកាលបង្កគ្រោះរាំងស្ងួត ហើយជួនកាលទៀតបង្កឲ្យមានទឹកជំនន់ ៕