ឧបនាយករដ្ឋមន្ត្រីអ៊ុយក្រែន លោកស្រី Olha Stefanishyna នៅថ្ងៃព្រហស្បតិ៍ (ទី១០ ខែមេសា) នេះ បាននិយាយថា ការពិគ្រោះយោបល់ផ្នែកបច្ចេកទេស រវាងសហរដ្ឋអាមេរិក និងអ៊ុយក្រែន អំពីកិច្ចព្រមព្រៀងរ៉ែ នឹងចាប់ផ្តើមនៅទីក្រុងវ៉ាស៊ីនតោន សហរដ្ឋងាមេរិក នាថ្ងៃសុក្រ ហើយនឹងមិនជ្រៀតជ្រែកដល់ការប្តេជ្ញាចិត្តផ្នែកហិរញ្ញវត្ថុផ្សេងទៀតរបស់ទីក្រុងគីវនោះឡើយ។

ប្រធានាធិបតីអាមេរិក លោក Donald Trump កំពុងប្រឹងប្រែងឲ្យមានកិច្ចព្រមព្រៀងរ៉ែទ្វេភាគី ដែលជាផ្នែកមួយនៃការជំរុញសន្តិភាព ដើម្បីបញ្ចប់សង្រ្គាមរបស់រុស្ស៊ី នៅអ៊ុយក្រែន។ លោកក៏មើលឃើញផងដែរថា វាជាមធ្យោបាយមួយ ដើម្បីទាញយកមកវិញនូវប្រាក់រាប់ពាន់លានដុល្លារដែលបានចំណាយលើជំនួយយោធាដល់ទីក្រុងគីវ ទោះបីជាជំនួយនេះមិនមែនជាប្រាក់កម្ចីក៏ដោយ។

អំឡុងពេលនិយាយទៅកាន់អ្នកសារព័ត៌មាន នៅទីក្រុងប្រ៊ុចសែល ប្រទេសបែលហ្ស៊ិក លោកស្រី Stefanishyna បានប្រាប់ថា ក្រុមរបស់សហរដ្ឋអាមេរិក និងអ៊ុយក្រែន នឹងជួបប្រជុំគ្នានៅថ្ងៃសុក្រ ហើយបានបន្ទរតាមជំហររបស់ទីក្រុងគីវ ដែលថា ការមានកិច្ចព្រមព្រៀងខាងមុខណាមួយ នឹងមិនប្រទាំងប្រទើសជាមួយកាតព្វកិច្ចដែលទាក់ទងនឹងជំនួយពីសហភាពអឺរ៉ុប (EU) ឬមូលនិធិរូបិយវត្ថុអន្តរជាតិ (IMF) នោះឡើយ។

លោកស្រីបាននិយាយថា៖ «គ្មានអ្វីអាចត្រូវបានចរចាជាមួយអ៊ុយក្រែន ក្នុងវិធីមួយដែលនឹងធ្វើឲ្យខូចដល់ការប្តេជ្ញាចិត្ត និងកាតព្វកិច្ចដែលមានស្រាប់ដែលអ៊ុយក្រែនមាន ក្នុងនោះរួមមានទាំងការប្ដេជ្ញាផ្សេងៗផ្នែកហិរញ្ញវត្ថុផងដែរ។ នេះជាអ្វីដែលមិនស្ថិតនៅក្នុងទម្រង់ការចរចាណាមួយឡើយ»។

គួររំលឹកថា ទីភ្នាក់ងារសារព័ត៌មាន Reuters បានរាយការណ៍កាលពីខែមុនថា រដ្ឋបាលរបស់លោក Trump បានបង្ហាញសេចក្តីព្រាងកាន់តែទូលំទូលាយបន្ថែមទៀត សម្រាប់កិច្ចព្រមព្រៀងនេះ ដោយបានកែប្រែសំណើដើមរបស់ខ្លួន ហើយកំពុងមានគោលបំណងឲ្យទទួលបានសិទ្ធិពិសេសគ្រប់គ្រងធនធានក្រោមដីដ៏សម្បូរបែបរបស់អ៊ុយក្រែន៕