ការសម្រេចរបស់ប្រធានាធិបតីអាមេរិក លោក Donald Trump ក្នុងការផ្ដល់ផលប៉ះពាល់ដល់ស្វីស ជាមួយនឹងអត្រាពន្ធធ្ងន់ធ្ងរជាងប្រទេសអឺរ៉ុបភាគច្រើន គឺជាការភ្ញាក់ផ្អើលយ៉ាងខ្លាំងមួយ ចំពោះប្រទេសដែលផ្តោតលើការនាំចេញ ដោយជំរុញឲ្យប្រទេសនេះតម្រង់ឆ្ពោះទៅសហភាពអឺរ៉ុប (EU) ខណៈដែលខ្លួនរួសរាន់ទប់ស្កាត់ផលប៉ះពាល់ពីវិធានការនោះ។

ទោះបីជាមានការធូរស្រាលដែលលោក Trump បានបន្ទាបពន្ធជាបណ្តោះអាសន្ន កាលពីថ្ងៃពុធ (ទី៩ ខែមេសា) ក៏ដោយ ក៏សម្រាប់អ្នកតស៊ូមតិឲ្យមានទំនាក់ទំនងកាន់តែរឹងមាំ ដំណាក់នេះ បានបញ្ជាក់នូវអំណះអំណាងរបស់ពួកគេ ដែលថា ពិភពលោកកាន់តែមិនអាចទាយទុកជាមុនបាន មានន័យថា ប្រទេសស្វីសត្រូវតែបង្កើនការចូលរួមពាក់ព័ន្ធជាមួយប្រទេសជិតខាង EU របស់ខ្លួន។

ស្វីសបានបោះជំហានដំបូងឆ្ពោះទៅរកការធ្វើសមាហរណកម្មសេដ្ឋកិច្ចកាន់តែជិតស្និទ្ធ កាលពីខែធ្នូឆ្នាំមុន នៅពេលដែលខ្លួនបានឈានដល់កិច្ចព្រមព្រៀងនយោបាយជាមួយទីក្រុងប្រ៊ុចសែល ដើម្បីកែលម្អទំនាក់ទំនងពាណិជ្ជកម្មរួមគ្នារបស់ភាគីទាំង២។

កិច្ចព្រមព្រៀងជាមួយ EU នោះ ប្រឈមមុខនឹងដំណើរការអនុម័តដ៏យូរ ប៉ុន្តែនៅក្នុងបទសម្ភាសន៍ជាមួយកាសែតកាលពីថ្ងៃពុធ ប្រធានាធិបតី និងរដ្ឋមន្ត្រីហិរញ្ញវត្ថុស្វីស លោកស្រី Karin Keller-Sutter បានលើកឡើងពីកិច្ចព្រមព្រៀងនោះ ខណៈដែលលោកស្រីបានវាយតម្លៃពីជម្រើសរបស់ប្រទេសស្វីស បន្ទាប់ពីរងផលប៉ះពាល់ពាណិជ្ជកម្មយ៉ាងធ្ងន់ធ្ងរដោយសារពន្ធសហរដ្ឋអាមេរិក។

លោកស្រីបានប្រាប់សារព័ត៌មាន Neue Zuercher Zeitung ថា៖ «យើងចង់ធ្វើឲ្យមានស្ថិរភាព និងធ្វើឲ្យទំនាក់ទំនងកាន់តែស៊ីជម្រៅជាមួយ EU»។ 

នៅថ្ងៃសុក្រ (ទី១១ ខែមេសា) លោកស្រី Keller-Sutter នឹងក្លាយជារដ្ឋមន្ត្រីហិរញ្ញវត្ថុស្វីសដំបូងគេដែលចូលរួមក្នុងកិច្ចប្រជុំនៃសមភាគីរបស់លោកស្រីមកពី EU ដែល Trump កាលពីសប្តាហ៍មុន បានដាក់អត្រាពន្ធ ២០ភាគរយ ជាកម្រិតទាបជាង ៣១ភាគរយ ដែលលោកដាក់លើប្រទេសស្វីស។ ឥឡូវនេះទាំងស្វីស និង EU ប្រឈមនឹងកាតព្វកិច្ច ១០ភាគរយ៕