ចំនួនមនុស្សស្លាប់សរុបពីហេតុការណ៍បាក់ដំបូលក្លិបរាត្រី Jet Set នៅទីក្រុង Santo Domingo របស់សាធារណរដ្ឋដូមីនីក បានកើនឡើងដល់ ២១៨នាក់ ក្នុងនោះមនុស្ស ១៨៩នាក់ ត្រូវបានជួយសង្រ្គោះអាយុជីវិត ។ នេះបើយោងតាមការអះអាងរបស់មន្ទីរប្រតិបត្តិការសង្រ្គោះបន្ទាន់ដូមីនីកបានឲ្យដឹងនៅថ្ងៃព្រហស្បតិ៍នេះ ។

ពេញមួយយប់ថ្ងៃពុធ ក្រុមគ្រួសារបានរង់ចាំនៅខាងក្រៅក្លិបរាត្រី Jet Set ទាំងភាពអន្ទះសារ ចង់ដឹងព័ត៌មានសាច់ញាតិរបស់ពួកគេដែលបានបាត់ខ្លួន និងបានចែករំលែករូបថតជាមួយនគរបាល ។ 

ក្រុមសង្គ្រោះបន្ទាន់ បានដាក់ពង្រាយគ្រឿងចក្រធុនធ្ងន់ ដើម្បីពន្លឿនកិច្ចខិតខំប្រឹងប្រែងជួយសង្គ្រោះរបស់ពួកគេ ។

សូមបញ្ជាក់ថា ក្លិបរាត្រី Jet Set បានបាក់កាលពីថ្ងៃអង្គារ ហើយរយៈពេល ២ថ្ងៃកន្លងមកនេះ ក្រុមសាច់ញាតិនៅតែបន្តរង់ចាំដំណឹងមនុស្សជាទីស្រលាញ់របស់ពួកគេនៅក្រៅគំនរបាក់បែកអគារ ។

សោកនាដកម្មនេះដែរ បានកើតមានឡើង អំឡុងការប្រគុំតន្រ្តីរបស់តារាចម្រៀងដ៏មានប្រជាប្រិយភាពមួយរូបរបស់ដូមីនីគឺលោក Rubby Perez ៕