លោកអភិបាលក្រុងញូវយ៉ក Eric Adams បាននិយាយថា ឧទ្ធម្ភាគចក្រទេសចរណ៍មួយគ្រឿង បានធ្លាក់ចូលទៅក្នុងទន្លេ Hudson នៃទីក្រុងញូវយ៉ក សហរដ្ឋអាមេរិក កាលពីថ្ងៃព្រហស្បតិ៍ (១០ មេសា) ដោយសម្លាប់មនុស្សទាំងអស់ ៦នាក់ នៅលើនោះ រួមទាំងកុមារ ៣នាក់ផងដែរ។

អភិបាលក្រុងបានបន្ថែមនៅក្នុងសន្និសីទខ្លីមួយថា ជនរងគ្រោះទាំងនោះត្រូវបានគេជឿថា ជាក្រុមគ្រួសារមួយមកពីអេស្ប៉ាញ ដែលរួមមានមនុស្សពេញវ័យ ២នាក់ កុមារ ៣នាក់ ហើយនិងអាកាសយានិកម្នាក់។

វីដេអូនៃគ្រោះថ្នាក់បានបង្ហាញពីអ្វីដែលមើលទៅដូចជាវត្ថុធំមួយធ្លាក់ក្នុងទន្លេ ហើយប៉ុន្មានវិនាទីក្រោយមកក៏មានអ្វីដែលមើលទៅដូចជាស្លាបឧទ្ធម្ភាគចក្រធ្លាក់។ បន្ទាប់មក ទូកសង្គ្រោះបន្ទាន់ និងនគរបាលត្រូវបានគេឃើញប្រតិបត្តិការជុំវិញផ្នែកមួយនៃទន្លេដែលឧទ្ធម្ភាគចក្របានលិច ដោយមានតែអ្វីដែលមើលទៅដូចជាឧបករណ៍ចុះចតរបស់យន្តហោះប៉ុណ្ណោះ អណ្ដែតលើផ្ទៃទឹក។

ស្នងការនគរបាលក្រុងញូវយ៉កនិយាយថា ឧទ្ធម្ភាគចក្រ Bell 206 ដែលដំណើរការដោយក្រុមហ៊ុនទេសចរណ៍ New York Helicopter Tours នោះបានចេញដំណើរនៅម៉ោងក្នុងស្រុកប្រហែល ៣រសៀលពីចំណតឧទ្ធម្ភាគចក្រមួយកន្លែង ហើយហោះទៅភាគខាងជើងលើទន្លេ Hudson។

នគរបាលបន្ថែមថា យន្តហោះនោះបានបត់ទៅទិសខាងត្បូង ទៅដល់ស្ពាន George Washington ហើយក៏ធ្លាក់នៅប៉ុន្មាននាទីក្រោយមក ដោយបានដាំក្បាលចុះក្រោម ហើយលិចនៅជិតតំបន់ Manhattan នៅម៉ោងប្រហែល ៣:១៥នាទីរសៀល។ រដ្ឋបាលអាកាសចរណ៍សហព័ន្ធ និងក្រុមប្រឹក្សាសុវត្ថិភាពដឹកជញ្ជូនជាតិ នឹងដឹកនាំការស៊ើបអង្កេតលើមូលហេតុនៃការធ្លាក់នេះ។

គួរឱ្យដឹងថា លំហអាកាសជុំវិញតំបន់ Manhattan របស់ក្រុងញូវយ៉ក ពោរពេញដោយឧទ្ធម្ភាគចក្រ ដែលផ្តល់ជូនអ្នកទេសចរនូវទិដ្ឋភាពនៃទេសភាពដ៏ស្រស់ស្អាតពីលើអាកាស ហើយទីក្រុងញូវយ៉កក៏មានប្រវត្តិគ្រោះថ្នាក់ទាក់ទងនឹងឧទ្ធម្ភាគចក្រជាច្រើនមកហើយ៕