តម្លៃប្រេងបានធ្លាក់ចុះជាថ្មីម្ដងទៀតនៅថ្ងៃសុក្រ (១១ មេសា) នេះ ហើយនឹងក្លាយជាការធ្លាក់ដាំក្បាលចុះសម្រាប់សប្តាហ៍ទីពីរ ដោយសារក្តីបារម្ភថា សង្រ្គាមពាណិជ្ជកម្មដ៏អូសបន្លាយរវាងសហរដ្ឋអាមេរិក និងចិន ដែលជាប្រទេសមានសេដ្ឋកិច្ចធំជាងគេលើពិភពលោកទាំងពីរ នឹងបំផ្លាញការប្រើប្រាស់ប្រេងឆៅ ខណៈជម្លោះពន្ធរបស់ពួកគេកាត់បន្ថយកំណើនសេដ្ឋកិច្ច និងតម្រូវការ។

ហ៊ុនប្រេងឆៅរបស់ Brent បានធ្លាក់ចុះ ៣១សេន ឬ ០,៥% មកត្រឹម ៦៣,០២ដុល្លារក្នុងមួយបារ៉ែល ត្រឹមម៉ោងសកល ០១:៥៣នាទី រំលងអាធ្រាត្រចូលថ្ងៃសុក្រនេះ ខណៈហ៊ុនប្រេងឆៅរបស់អាមេរិក WTI បានធ្លាក់ចុះ ៣៦សេន ឬ ០,៦% មកនៅត្រឹម ៥៩,៧១ដុល្លារ។ សន្ទស្សន៍ហ៊ុនទាំងពីរបានទូទាត់ទាបជាង ២ដុល្លាររួចទៅហើយ កាលពីថ្ងៃព្រហស្បតិ៍។

Brent ត្រូវបានកំណត់ថានឹងធ្លាក់ចុះសរុប ៤% នៅសប្តាហ៍នេះ បន្ថែមពីលើការថយចុះ ១១% ក្នុងសប្តាហ៍មុន ខណៈ WTI ត្រូវបានកំណត់ថារអិលចុះ ៣,៨% បន្ទាប់ពីបានធ្លាក់ ១១% ដូចគ្នាក្នុងសប្តាហ៍មុន។ អ្នកយុទ្ធសាស្រ្តទំនិញជាន់ខ្ពស់នៅធនាគារ ANZ បាននិយាយនៅថ្ងៃសុក្រនេះថា តម្លៃប្រេងស្ថិតក្រោមសម្ពាធ ដោយសារការព្រួយបារម្ភអំពីការធ្លាក់ចុះនៃសេដ្ឋកិច្ចពិភពលោក។

ជម្លោះពាណិជ្ជកម្មអូសបន្លាយរវាងសហរដ្ឋអាមេរិក និងចិន ទំនងជាកាត់បន្ថយទំហំពាណិជ្ជកម្មសកល និងរំខានដល់ផ្លូវពាណិជ្ជកម្ម ហើយនៅទីបំផុត នឹងដាក់បន្ទុកលើកំណើនសេដ្ឋកិច្ចពិភពលោក។ ក្នុងនាមជាអ្នកប្រើប្រាស់ប្រេងធំជាងគេទាំងពីររបស់ពិភពលោក ជម្លោះពាណិជ្ជកម្មអាមេរិក-ចិន ក៏នឹងប៉ះពាល់ដល់ការប្រើប្រាស់ប្រេងឆៅផងដែរ៕