បុគ្គលិកដឹកជញ្ជូនសាធារណៈក្នុងរដ្ឋធានី Lima ប្រទេសប៉េរូ បានប៉ះទង្គិចជាមួយនគរបាល កាលពីថ្ងៃព្រហស្បតិ៍ ទី១០ មេសា ក្នុងអំឡុងពេលធ្វើកូដកម្មដើម្បីទាមទារឱ្យមានចំណាត់ការប្រឆាំងនឹងរលកឧក្រិដ្ឋកម្មកំពុងកើនឡើង ដែលនាំឱ្យមានចំនួនឃាតកម្មខ្ពស់។

ក្នុងអំឡុងពេលបាតុកម្មទៅកាន់សភា បុគ្គលិកដឹកជញ្ជូនដែលឈរអមដោយមន្ត្រីនគរបាលរាប់រយនាក់បានកាន់ស្លាកដែលសរសេរថា «គ្មានទេការជំរិតទារប្រាក់» និងពាក្យថា «ពួកគេកំពុងសម្លាប់យើង» ក្នុងចំណោមពាក្យផ្សេងៗទៀត។

របាយការណ៍ពីប្រព័ន្ធផ្សព្វផ្សាយរបស់ប្រទេសប៉េរូ បានឲ្យដឹងថា ការប៉ះទង្គិចបានផ្ទុះឡើង ខណៈក្រុមមន្ត្រីបានបិទផ្លូវចូលទៅកាន់តំបន់ជុំវិញសភា។ នៅទីបំផុត ក្រុមបាតុករ បានទម្លាយខ្សែហ៊ុមព័ទ្ធរបស់នគរបាល ហើយបានរុលចូលទៅមុខ។

តួលេខរដ្ឋាភិបាលបានបង្ហាញថា ករណីឃាតកម្មនៅក្នុងប្រទេសប៉េរូក្នុងឆ្នាំ២០២៤ បានកើនឡើងដល់ជាងមួយភាគបី ដល់ចំនួន២.០៥៩ករណី ពីចំនួន១.៥០៨ ក្នុងឆ្នាំ២០២៣។ ករណីឃាតកម្ម និងការជំរិតទារប្រាក់ពីបុគ្គលិកដឹកជញ្ជូន បានកើនឡើងផងដែរ ដោយមានការសម្លាប់មនុស្សរាប់សិបនាក់នៅក្នុងឆ្នាំនេះ។