​អាមេរិក៖ ប្រធានាធិបតី​សហរដ្ឋអាមេរិក​លោក Joe Biden កាលពី​ថ្ងៃ​សុក្រ​បាន​សន្យា​ថា ​នឹង​ធ្វើ​ឱ្យ​ពិបាក​ខ្លាំងសម្រាប់​ប្រធានាធិបតី​រុស្ស៊ី​លោក Vladimir Putin ក្នុង​ការ​ចាត់​វិធានកា​រ​យោធា​នៅ​ក្នុងប្រទេស​អ៊ុយ​ក្រែ​ន​ ដោយ​លោក​បាន​និយាយ​ថា ​រដ្ឋបាល​របស់​លោក​កំពុង​រួមគ្នា​នូវ​គំនិត​ផ្ដួចផ្ដើម​ដ៏​ទូលំទូលាយដើម្បី​ទប់ស្កាត់​ការបំពាន​របស់​ប្រទេស​រុស្ស៊ី​។

​លោក​ប្រធានាធិបតី Biden ​បាន​ព្រមាន​លោក Putin ក្នុង​ពេល​មានការ​ព្រួយបារម្ភ​កាន់​តែ​ខ្លាំង​ឡើង អំពី​ការ​កើន​ឡើង​នៃ​កងទ័ព​រុស្ស៊ី​នៅ​តាម​ព្រំដែន​ប្រទេស​អ៊ុយ​ក្រែ​ន​។ លោក Biden បាន​និយាយ​ថា អ្វី​ដែលលោក​កំពុង​ធ្វើ​គឺ​ការ​រួមគ្នា​នូវ​អ្វី​ដែល​លោក​ជឿ​ថា ​នឹង​ក្លាយ​ជា​គំនិត​ផ្ដួចផ្ដើម​ដ៏​ទូលំទូលាយដើម្បី​ធ្វើឱ្យ​ពិបាក​ខ្លាំង​សម្រាប់​លោក Putin ​ក្នុង​ការ​ដើរ​ឆ្ពោះ​ទៅ​មុខ​។ ​មាន​សញ្ញា​បង្ហាញ​ថា​ សេត​វិមាន និង​វិមាន​ក្រឹម​ឡាំង​នឹង​រៀបចំ​កិច្ច​សន្ទនា​មួយ​នៅ​សប្ដាហ៍​ក្រោយរវាង​លោក Biden និង​លោក​ Putin​។​ ​ទីប្រឹក្សា​កិច្ច​ការបរទេស​របស់​លោក Putin លោក​ Yuri Ushakov បាន​និយាយ​កាលពី​ថ្ងៃ​សុក្រ​ថា ការ​រៀបចំ​ត្រូវ​បាន​ធ្វើឡើង​សម្រាប់​ការសន្ទនា​តាម​ទូរស័ព្ទ​រវាង​លោក Putin និង​លោក Biden នៅ​ថ្ងៃ​ខាង​មុខ ហើយ​កាលបរិច្ឆេទ​នឹង​ត្រូវ​បាន​ប្រកាស​បន្ទាប់​ពី​ទីក្រុង​ម៉ូស្គូ និង​វ៉ាស៊ីនតោន​បញ្ចប់​ព័ត៌មាន​លម្អិត​។

លោក Biden មិនបាន​បញ្ជាក់​អំពី​ស​កម្ម​ភាព​ដែល​លោក​កំពុង​ថ្លឹងថ្លែង​នោះ​ទេ​។ ប៉ុន្តែ​រដ្ឋមន្ត្រី​ការបរទេស​រុស្ស៊ី​លោក Sergey Lavrov ដែល​បាន​ជួប​ជាមួយ​រដ្ឋមន្ត្រីការបរទេស​សហរដ្ឋអាមេរិក​លោក Antony Blinken ក្នុង​ប្រទេស​ស៊ុយអែត​កាលពី​ថ្ងៃ​ព្រហស្បតិ៍​បាន​និយាយ​ថា សហរដ្ឋអាមេរិក​បាន​គំរាម​ដាក់ទណ្ឌកម្ម​ថ្មី​។ លោក​មិនបាន​បញ្ជាក់​អំពី​ទណ្ឌកម្ម​ដែល​អាច​កើតមាន​នោះ​ទេ ប៉ុន្តែ​បាន​និយាយ​ថា ​កិច្ចប្រឹងប្រែង​នេះ​នឹង​គ្មាន​ប្រសិទ្ធភាព​ឡើយ​៕

អត្ថបទ៖ ប៊ុនថន