ប្រធានាធិបតីអាមេរិក លោក Donald Trump បាននិយាយកាលពីថ្ងៃព្រហស្បតិ៍ (១០ មេសា) ថា លោកចង់ទទួលបានកិច្ចព្រមព្រៀងជាមួយប្រទេសចិន ដើម្បីបញ្ចប់សង្គ្រាមពាណិជ្ជកម្មដែលកំពុងកើនឡើង ហើយក្រសួងពាណិជ្ជកម្មចិន ក៏បាននិយាយថា ទីក្រុងប៉េកាំង បើកចំហសម្រាប់ការសន្ទនាជាមួយអាមេរិក ប៉ុន្តែរឿងនេះត្រូវតែឈរលើមូលដ្ឋាននៃការគោរពគ្នាទៅមក និងសមភាព។

លោក Trump បានធ្វើអត្ថាធិប្បាយបែបនោះក្នុងអំឡុងពេលកិច្ចប្រជុំគណៈរដ្ឋមន្ត្រី ហើយរដ្ឋមន្ត្រីក្រសួងរតនាគារអាមេរិក Scott Bessent បាននិយាយនៅក្នុងកិច្ចប្រជុំថា អាមេរិកកំពុងសម្របសម្រួលកិច្ចព្រមព្រៀងជាមួយប្រទេសនានា ដែលនឹងនាំមកនូវភាពប្រាកដប្រជាបន្ថែមទៀតលើពាណិជ្ជកម្ម។

ជាមួយគ្នានេះ នៅពេលត្រូវសាកសួរថាតើប្រទេសសេដ្ឋកិច្ចធំជាងគេទាំងពីរនេះបានចាប់ផ្តើមការចរចារពន្ធឬទេ លោកស្រី He Yongqian អ្នកនាំពាក្យក្រសួងពាណិជ្ជកម្មចិន បានលើកឡើងថា សម្ពាធ ការគម្រាមកំហែង និងការបង្ខូចកេរ្តិ៍ឈ្មោះមិនមែនជាវិធីត្រឹមត្រូវដើម្បីដោះស្រាយជាមួយចិនឡើយ ហើយទីក្រុងប៉េកាំង បើកចំហសម្រាប់ការសន្ទនាជាមួយអាមេរិក ប៉ុន្តែរឿងនេះត្រូវតែឈរលើមូលដ្ឋាននៃការគោរពគ្នាទៅវិញទៅមក និងស្មើភាព ហើយចិន នៅតែត្រៀមខ្លួនជាស្រេចដើម្បីតតាំងដល់ទីបញ្ចប់។

គួរឱ្យដឹងថា លោក Trump បានប្រកាសផ្អាកពន្ធរយៈពេល ៩០ថ្ងៃលើប្រទេសរាប់សិប ប៉ុន្តែលោកបានដំឡើងពន្ធលើការនាំចូលរបស់ចិន សរុបទាំងមុន ទាំងក្រោយឡើងដល់ ១៤៥% គិតទាំងពន្ធចុងក្រោយ ១២៥% និងការយកពន្ធ ២០% ដែលបានដាក់កាលពីដើមឆ្នាំនេះ។ ចិនក៏បាននឹងកំពុងដំឡើងពន្ធសងសឹកលើអាមេរិក តបតនឹងពន្ធនីមួយៗរបស់លោក Trump ដោយបង្កើនការភ័យខ្លាចថាទីក្រុងប៉េកាំង អាចបង្កើនពន្ធលើសពី ៨៤% នាពេលបច្ចុប្បន្ន៕