សហរដ្ឋអាមេរិក និងរុស្ស៊ី បានលើកឡើងកាលពីថ្ងៃព្រហស្បតិ៍ (១០ មេសា) ថា ភាគីទាំងពីរបានដំណើរការឆ្ពោះទៅរកប្រក្រតីភាពនៃបេសកកម្មការទូតរបស់ពួកគេ ហើយកិច្ចពិភាក្សាស្តីពីបញ្ហានេះមានលក្ខណៈស្ថាបនា និងវិជ្ជមាន ប៉ុន្តែអាមេរិក ក៏បង្ហើបថា ខ្លួននៅតែបារម្ភពីគោលនយោបាយរបស់រុស្ស៊ី ដែលហាមប្រាមការងាររបស់បុគ្គលិកក្នុងស្រុក។

កិច្ចប្រជុំនៃគណៈប្រតិភូអាមេរិក និងរុស្ស៊ី នៅទីក្រុងអ៊ីស្តង់ប៊ុល បានធ្វើឡើងបន្ទាប់ពីកិច្ចចរចាដំបូងក្នុងខែកុម្ភៈ ក្រោយពីសង្រ្គាមនៅអ៊ុយក្រែន បានបង្កឱ្យមានការប្រឈមមុខដាក់គ្នាដ៏ធំបំផុតរវាងទីក្រុងមូស្គូ និងលោកខាងលិច ចាប់តាំងពីជម្រៅនៃសង្គ្រាមត្រជាក់មក។

កិច្ចពិភាក្សានេះដឹកនាំដោយក្រុមមន្រ្តីជាន់ខ្ពស់របស់រុស្ស៊ីជាច្រើនរូប។ ប្រភពនិយាយថា គណៈប្រតិភូអាមេរិក បានចំណាយពេលប្រហែល ៦ម៉ោងនៅឯអគារកុងស៊ុលរុស្ស៊ី នៅកណ្តាលទីក្រុងអ៊ីស្តង់ប៊ុល សម្រាប់កិច្ចពិភាក្សាបិទទ្វារនេះ។ អ្នកនាំពាក្យក្រសួងការបរទេសអាមេរិក បាននិយាយរួចហើយកាលពីថ្ងៃអង្គារសប្ដាហ៍នេះថា រឿងអ៊ុយក្រែនមិនស្ថិតនៅក្នុងរបៀបវារៈនោះទេ។

ក្រសួងការបរទេសអាមេរិក បាននិយាយថា កិច្ចពិភាក្សាកាលពីថ្ងៃព្រហស្បតិ៍នេះបានបន្ត "ក្នុងវិធីសាស្រ្តស្ថាបនា" ដែលត្រូវបានបង្កើតឡើងនៅក្នុងកិច្ចប្រជុំថ្ងៃទី២៧ ខែកុម្ភៈ។ ទីភ្នាក់ងារសារព័ត៌មានរដ្ឋរុស្ស៊ី TASS ក៏បានរាយការណ៍ថា ឯកអគ្គរដ្ឋទូតរុស្ស៊ីប្រចាំនៅសហរដ្ឋអាមេរិក បាននិយាយថា កិច្ចពិភាក្សាលើការបង្កើតបេសកកម្មការទូតឡើងវិញរបស់ប្រទេសទាំងពីរ បង្កើតបានវឌ្ឍភាពយ៉ាងល្អ៕