ក្រុមមន្ត្រី និងប្រព័ន្ធផ្សព្វផ្សាយបាននិយាយថា មនុស្សជិត ១០០នាក់ បានស្លាប់ចាប់តាំងពីថ្ងៃពុធ ០៩ មេសា សប្ដាហ៍នេះមក បន្ទាប់ពីភ្លៀងធ្លាក់ខ្លាំងវាយប្រហារផ្នែកខ្លះនៃប្រទេសឥណ្ឌា និងនេប៉ាល់ ហើយទីភ្នាក់ងារអាកាសធាតុបានព្យាករថា នឹងមានភ្លៀងធ្លាក់កក់ខែកាន់តែច្រើនទៀតសម្រាប់តំបន់នេះ។

ក្រសួងឧតុនិយមឥណ្ឌា (IMD) កាលពីថ្ងៃពុធ បានបង្កើនការព្រមានពីគ្រោះថ្នាក់ជាច្រើនសម្រាប់ប្រទេសនេះ ជាមួយនឹងស្ថានភាពរលកកម្ដៅនៅតំបន់ភាគខាងលិច និងផ្គររន្ទះដ៏ខ្លាំងក្លានៅតំបន់ភាគខាងកើត និងកណ្តាល។

មន្រ្តីក្នុងតំបន់និយាយថា នៅរដ្ឋ Bihar ភាគខាងកើតឥណ្ឌា មនុស្សយ៉ាងតិច ៦៤នាក់ បានស្លាប់នៅក្នុងឧប្បត្តិហេតុទាក់ទងនឹងភ្លៀងចាប់តាំងពីថ្ងៃពុធមក ហើយប្រព័ន្ធផ្សព្វផ្សាយក្នុងស្រុកបានរាយការណ៍ថា មនុស្សជាង ២០នាក់បានស្លាប់នៅក្នុងរដ្ឋ Uttar Pradesh ដែលមានប្រជាជនច្រើនបំផុតរបស់ឥណ្ឌា។

ជាមួយគ្នានេះ មន្ត្រីអាជ្ញាធរគ្រោះមហន្តរាយជាតិរបស់ប្រទេសជិតខាង នេប៉ាល់ បាននិយាយថា រន្ទះបាញ់ និងភ្លៀងធ្លាក់ខ្លាំងក៏បានសម្លាប់មនុស្សយ៉ាងតិច ៨នាក់ផងដែរក្នុងប្រទេសនេះ។

រដូវមូសុងជាធម្មតាចាប់ផ្តើមនៅខែមិថុនា នៅភាគខាងត្បូងឥណ្ឌា និងនេប៉ាល់ ហើយខែរដូវក្តៅនាពេលថ្មីៗនេះ កើតមានរលកកម្ដៅដ៏ខ្លាំងក្លា ដែលបានសម្លាប់មនុស្សជាច្រើន៕