មន្ត្រីជាន់ខ្ពស់មួយរូប បានព្រមានកាលពីថ្ងៃព្រហស្បតិ៍ថា មនុស្សរាប់ម៉ឺននាក់ នឹងស្លាប់ នៅក្នុងប្រទេសស៊ូដង់ ប្រសិនបើសង្គ្រាមស៊ីវិលរបស់ប្រទេសនេះ នៅតែបន្ត រយៈពេលមួយឆ្នាំទៀត ដោយអង្គការសហប្រជាជាតិប្រឈមនឹងកង្វះថវិកាជំនួយស្បៀងអាហារយ៉ាងច្រើន ហើយមិនអាចទៅដល់អ្នកដែលងាយរងគ្រោះបំផុត ដោយសារទុរ្ភិក្ស។

លោក Shaun Hughes អ្នកសម្របសម្រួលជំនួយសង្គ្រោះបន្ទាន់របស់កម្មវិធីស្បៀងអាហារពិភពលោក (WFP)សម្រាប់វិបត្តិស៊ូដង់ បានប្រាប់សន្និសីទសារព័ត៌មានរបស់UNថា ជម្លោះដែលបានចាប់ផ្តើមកាលពីពីរឆ្នាំកន្លងទៅ បានបង្កឲ្យមានអ្វីដែលជាវិបត្តិមនុស្សធម៌ធំបំផុត ក្នុងពិភពលោក។ 

លោកបាននិយាយថា គ្រោះទុរ្ភិក្ស បានរីករាលដាលដល់តំបន់ចំនួន ១០ នៅក្នុងតំបន់ Darfur និង Kordofan ហើយគំរាមកំហែងហ៊ុមព័ទ្ធតំបន់ចំនួន ១៧ ផ្សេងទៀត។ ប្រសិនបើកម្មវិធីស្បៀងអាហារពិភពលោក (WFP) មិនអាចដោះស្រាយកង្វះថវិកាចំនួន ៦៥០លានដុល្លារ សម្រាប់ប្រតិបត្តិការរបស់ខ្លួន ក្នុងរយៈពេល ៦ខែ ខាងមុខ ដែលស្មើនឹងការខ្វះខាតចំនួន ៨០% និងជំនួយមិនអាចទៅដល់អ្នក ដែលកំពុងត្រូវការនោះទេ លោកបាននិយាយថា វិបត្តិនេះ នឹងអាចគ្រប់គ្រងបានឡើយ។

លោក Hughes បាននិយាយអំឡុងពេលការទំនាក់ទំនងតាមវីដេអូខលថា៖«សង្គ្រាមនេះ កំពុងមានផលវិបាកដ៏បំផ្លិចបំផ្លាញសម្រាប់ប្រជាជនស៊ូដង់ និងតំបន់ទាំងមូល។

«មនុស្សរាប់ម៉ឺននាក់ទៀត នឹងស្លាប់ នៅក្នុងប្រទេសស៊ូដង់ ក្នុងអំឡុងឆ្នាំទី៣នៃសង្គ្រាម ប្រសិនបើអង្គការ WFP និងភ្នាក់ងារមនុស្សធម៌ផ្សេងទៀត មិនមានលទ្ធភាព និងធនធាន ដើម្បីផ្តល់ទៅដល់អ្នកដែលកំពុងត្រូវការជំនួយទាំងនោះទេ»។