មន្ត្រីជាន់ខ្ពស់អង្គការសហប្រជាជាតិ បានព្រមានកាលពីថ្ងៃព្រហស្បតិ៍ថា ការបន្តការវាយប្រហារដោយយោធា របស់អ៊ីស្រាអែល កំពុងគំរាមកំហែងដល់ការផ្លាស់ប្តូរនយោបាយដ៏ផុយស្រួយរបស់ប្រទេសស៊ីរី និងធ្វើឲ្យប៉ះពាល់ដល់កិច្ចខិតខំប្រឹងប្រែងរបស់ខ្លួន ឆ្ពោះទៅរកសន្តិភាព និងស្ថិរភាព។

ថ្លែងក្នុងកិច្ចប្រជុំរបស់ក្រុមប្រឹក្សាសន្តិសុខ លោក Khaled Khiari ជំនួយការអគ្គលេខាធិការទទួលបន្ទុកកិច្ចការនយោបាយ និងការកសាងសន្តិភាព បាននិយាយថា ការវាយប្រហារតាមអាកាសរាប់រយដងរបស់ អ៊ីស្រាអែល បានកើតឡើង នៅទូទាំងប្រទេសស៊ីរី ចាប់តាំងពីការដួលរលំនៃរដ្ឋាភិបាលរបស់ លោក អា   សាដ ក្នុងខែធ្នូ ឆ្នាំ ២០២៤ ពោលគឺនៅភាគនិរតី ឆ្នេរសមុទ្រ ភាគឦសាន ទីក្រុងដាម៉ាស ហាម៉ា (Hama) និង និងហូម (Homes)។

កាលពីថ្ងៃទី ០៣ ខែមេសា មានសេចក្តីរាយការណ៍ថា អ៊ីស្រាអែលបានធ្វើការវាយប្រហារតាមអាកាសជាច្រើន ក្នុងប្រទេសស៊ីរី រួមទាំងនៅទីក្រុងដាម៉ាស អាកាសយានដ្ឋានយោធា Hama និងអាកាសយានដ្ឋានយោធា នៅទីក្រុងហូម ដែលជាការការកើនឡើងយ៉ាងទូលំទូលាយបំផុត ក្នុងរយៈពេលប៉ុន្មានខែថ្មីៗនេះ។ ការវាយប្រហារដំណាលគ្នា នៅក្នុងទីក្រុង Daraa ត្រូវបានគេរាយការណ៍ថា បានបណ្តាលឲ្យជនស៊ីវិល ៩នាក់ រងរបួស។

លោក Khiari បាននិយាយថា កងកម្លាំងការពារអ៊ីស្រាអែល (IDF) បានអះអាងជាសាធារណៈថា ខ្លួនបានសាងសង់ទីតាំងជាច្រើន នៅក្នុងតំបន់នៃការបំបែកខ្លួន នៅខ្ពង់រាប Golan Heights ខណៈដែលមន្ត្រីអ៊ីស្រាអែល ក៏បាននិយាយអំពីចេតនារបស់ប្រទេសនេះ ក្នុងការបន្តនៅក្នុងប្រទេសស៊ីរី «សម្រាប់អនាគតដ៏ខ្លីខាងមុខ»។ «ការពិតជាក់ស្តែងបែបនេះ គឺមិនងាយដកថយទៅវិញទេ។ ពួកគេ កំពុងគំរាមកំហែងដល់ការផ្លាស់ប្តូរនយោបាយដ៏ផុយស្រួយរបស់ប្រទេសស៊ីរី»។