លោកប្រធានាធិបតី ដូណាល់ ត្រាំ ( Donald Trump) បាននិយាយថា សហរដ្ឋអាមេរិករំពឹងថា នឹងសម្រេចបានកិច្ចព្រមព្រៀងជាមួយរុស្ស៊ី និងអ៊ុយក្រែន ក្នុងពេលឆាប់ៗនេះ។

លោកបានថ្លែងប្រាប់អ្នកយកព័ត៌មាន នៅឯសេតវិមានថា៖«យើងសង្ឃឹមថា យើងនឹងអាចធ្វើកិច្ចព្រមព្រៀង នាពេលឆាប់ៗនេះ ជាមួយរុស្ស៊ី និងអ៊ុយក្រែន ដើម្បីបញ្ឈប់ការប្រយុទ្ធគ្នា»។

លោកក៏បាននិយាយផងដែរថា ទីក្រុងវ៉ាស៊ីនតោន នឹងស៊ើបអង្កេតការចោទប្រកាន់របស់ទីក្រុងគីវអំពីការចូលរួមរបស់ពលរដ្ឋចិន នៅក្នុងប្រតិបត្តិការយោធាពិសេសរបស់រុស្ស៊ី នៅអ៊ុយក្រែន។

លោក ត្រាំ បាននិយាយថា៖«យើងនឹងពិនិត្យមើលពីការចោទប្រកាន់នេះ។ «ប៉ុន្តែខ្ញុំគិតលើសពីនោះទៅទៀត យើងពិតជាចង់ឲ្យសង្គ្រាមនេះត្រូវបញ្ចប់»។

អ្នកនាំពាក្យប្រធានាធិបតីរុស្ស៊ី លោក Dmitry Peskov បាននិយាយកាលពីថ្ងៃទី ០៧ ខែមេសា ថា លោកប្រធានាធិបតីវ្ល៉ាឌីមៀ ពូទីន គាំទ្របទឈប់បាញ់នៅអ៊ុយក្រែន ប៉ុន្តែមុននោះ បញ្ហាមួយចំនួនដែលត្រូវតែដោះស្រាយ ឥឡូវនេះ មិនទាន់បានបញ្ចប់នៅឡើយ។

ក្រសួងការបរទេសចិន បាននិយាយកាលពីថ្ងៃទី ០៩ ខែមេសាថា ទីក្រុងប៉េកាំង មិនបានបញ្ជូនបុគ្គលិកយោធារបស់ខ្លួន ទៅចូលរួមក្នុងជម្លោះអ៊ុយក្រែននោះទេ ហើយបានក្រើនរំលឹកពលរដ្ឋរបស់ខ្លួនឲ្យជៀសវាងការជាប់ពាក់ព័ន្ធក្នុងអរិភាព។ មុននេះ របាយការណ៍ បានចាប់ផ្តើមផ្សព្វផ្សាយក្នុងប្រទេសអ៊ុយក្រែនអំពីការចូលរួមរបស់ពលរដ្ឋចិន ក្នុងការប្រយុទ្ធគ្នានេះ។ លោក Peskov បានច្រានចោលការចោទប្រកាន់របស់វ៉្លូឌីមី ហ្សេឡិនស្គី អំពីទីក្រុងមូស្គូ ដែលអូសទាញប្រទេសចិនចូលទៅក្នុងជម្លោះ នៅអ៊ុយក្រែន។