មេបញ្ជាការជាន់ខ្ពស់អាមេរិកនៅតំបន់ប៉ាស៊ីហ្វិកកាលពីថ្ងៃព្រហស្បតិ៍ បានព្រមានសមាជិកព្រឹទ្ធសភាថា យោធាដែលគាំទ្រចិន និងកូរ៉េខាងជើង កំពុងផ្តល់ឲ្យរុស្ស៊ីក្នុងសង្គ្រាមរបស់ខ្លួនលើអ៊ុយក្រែន កំពុងបង្កើតហានិភ័យសន្តិសុខ នៅក្នុងតំបន់របស់លោក ខណៈដែលទីក្រុងមូស្គូ ផ្តល់ជំនួយផ្នែកយោធាដ៏សំខាន់ដល់ទាំងពីរ ជាថ្នូរនឹងគ្នា។

លោកឧត្តមនាវីឯក Samuel Paparo ប្រធានទីបញ្ជាការឥណ្ឌូ-ប៉ាស៊ីហ្វិករបស់អាមេរិក បានប្រាប់គណៈកម្មាធិការសេវាកម្មប្រដាប់អាវុធព្រឹទ្ធសភាថា ប្រទេសចិន បានផ្តល់ ៧០% នៃឧបករណ៍ម៉ាស៊ីន និង ៩០% នៃបន្ទះអេឡិចត្រូនិកចាស់ៗ ដល់រុស្ស៊ី ដើម្បីជួយក្រុងមូស្គូ «ជួសជុសគ្រឿងយុទ្ធោបករណ៍របស់ខ្លួនឡើងវិញ»។  

លោកបាននិយាយថា ជាថ្នូរនឹងគ្នានោះ ប្រទេសចិនកំពុងទទួលបានជំនួយផ្នែកបច្ចេកវិទ្យាយ៉ាងសំខាន់ ដើម្បីធ្វើឲ្យនាវាមុជទឹករបស់ខ្លួនផ្លាស់ទីកាន់តែស្ងប់ស្ងាត់ រួមជាមួយនឹងជំនួយផ្សេងទៀត។

សមាជិកព្រឹទ្ធសភា បានជំរុញឲ្យលោក Paparo និងលោកឧត្តមសេនីយ៍ Xavier Brunson មេបញ្ជាការកងកម្លាំងអាមេរិកកូរ៉េ ផ្តោតទៅលើភាពជឿនលឿនរបស់ចិន នៅក្នុងតំបន់ រួមទាំងការគំរាមកំហែងដល់កោះតៃវ៉ាន់ផងដែរ ហើយពួកគេក៏បានចោទសួរទាំងអំពីវត្តមានយោធាអាមេរិក នៅកូរ៉េខាងត្បូង និងថាតើវាគួរត្រូវបានការពារពីការកាត់បន្ថយបុគ្គលិកដែរឬអត់។

\លោកទាំងពីរ បាននិយាយថា កម្លាំងអាមេរិកបច្ចុប្បន្ននៅទីនោះ និងទូទាំងឥណ្ឌូ-ប៉ាស៊ីហ្វិកមានសារៈសំខាន់សម្រាប់ទាំងផ្នែកការទូត នៅក្នុងតំបន់ និងសន្តិសុខជាតិរបស់អាមេរិក នៅពេលដែលទំនាក់ទំនងរវាងរុស្ស៊ី និងចិន កាន់តែរីកចម្រើន។ សហរដ្ឋអាមេរិក មានទាហាន ២៨.៥០០នាក់ នៅប្រទេសកូរ៉េខាងត្បូង។