ភាពចលាចលមួយសប្តាហ៍ដែលបានកើតឡើងដោយសារអត្រាពន្ធគយរបស់ប្រធានាធិបតីអាមេរិក លោក Donald Trump បានបង្ហាញពីសញ្ញាធូរស្រាលតិចតួច នៅថ្ងៃសុក្រ (ទី១១ ខែមេសា) នេះ ខណៈទីផ្សារធ្លាក់ចុះម្តងទៀត ហើយបណ្ដាមេដឹកនាំបរទេស កំពុងព្យាយាមរិះរកវិធី ដើម្បីឆ្លើយតបទៅនឹងការធ្វើឲ្យសណ្ដាប់ធ្នាប់ពាណិជ្ជកម្មសកលរញ៉េរញ៉ៃនេះ។

ភាពច្របូកច្របល់ ក្នុងទីផ្សារហិរញ្ញវត្ថុ ទទួលបានភាពធូរស្រាលរយៈពេលខ្លី កាលពីថ្ងៃពុធ នៅពេលដែលលោក Trump បានសម្រេចផ្អាកកាតព្វកិច្ចពន្ធលើប្រទេសរាប់សិប សម្រាប់រយៈពេល ៩០ថ្ងៃ។ តែទោះជាយ៉ាងណានេះក៏ដោយ ក៏សង្គ្រាមពាណិជ្ជកម្មរបស់លោកដែលកំពុងឡើងកម្ដៅជាលំដាប់ ជាមួយនឹងប្រទេសសេដ្ឋកិច្ចលេខ ២ របស់ពិភពលោក គឺចិន បានជំរុញឲ្យមានក្ដីបារម្ភពីឱនភាពសេដ្ឋកិច្ច និងការសងសឹកបន្ថែមទៀត។

រដ្ឋមន្ត្រីក្រសួងរតនាគារអាមេរិក លោក Scott Bessent បានព្យាយាមសម្រាលដល់អ្នកមានបន្ទិលសង្ស័យទាំងឡាយ ដោយបានប្រាប់កិច្ចប្រជុំគណៈរដ្ឋមន្ត្រី កាលពីថ្ងៃព្រហស្បតិ៍ (ទី១០ ខែមេសា) ថា ប្រទេសជាង ៧៥ ចង់ចាប់ផ្តើមការចរចាពាណិជ្ជកម្ម ហើយលោក Trump ផ្ទាល់ បានបង្ហាញពីក្តីសង្ឃឹមពីការឈានដល់កិច្ចព្រមព្រៀងជាមួយប្រទេសចិន។

ប៉ុន្តែភាពមិនប្រាកដប្រជា ក្នុងពេលនេះ បានធ្វើឲ្យកាន់តែមានអស្ថិភាពដល់ទីផ្សារភាគហ៊ុនដែលមានការប្រែប្រួលខ្លាំងបំផុតជាយូរមកហើយ គិតចាប់តាំងពីប៉ុន្មានថ្ងៃដំបូងនៃជំងឺរាតត្បាតកូវីដ-១៩។

សន្ទស្សន៍ភាគហ៊ុន S&P 500 បានបញ្ចប់ការជូញដូរទាបជាង ៣,៥ភាគរយកាលពីថ្ងៃព្រហស្បតិ៍ ហើយឥឡូវនេះ បានធ្លាក់ចុះប្រហែល ១៥ភាគរយ ពោលគឺធ្លាក់ពីកម្រិតខ្ពស់បំផុត កាលពីខែកុម្ភៈ។ ហើយអ្នកវិភាគមួយចំនួនជឿថា ភាគហ៊ុននឹងដាំក្បាលចុះបន្ថែមទៀត ដោយសារតែភាពមិនច្បាស់លាស់ ជុំវិញគោលនយោបាយពន្ធរបស់សហរដ្ឋអាមេរិក៕