ការផ្ដល់ភាពច្របូកច្របល់យ៉ាងខ្លាំងក្លារបស់ប្រធានាធិបតីអាមេរិក លោក Donald Trump លើប្រព័ន្ធសេដ្ឋកិច្ចដែលអាមេរិកបានបង្កើតឡើងយ៉ាងទូលំទូលាយ បន្ទាប់ពីសង្គ្រាមលោកលើកទី២ កំពុងជះផលត្រលប់វិញ នៅក្នុងប្រទេស។ ហើយអ្វីដែលកើតឡើងនោះ មិនមែនជារឿងល្អឡើយ។

ជាក់ស្ដែង ការគាំទ្រលើលោក Trump កំពុងចាប់ផ្ដើមធ្លាក់ចុះបណ្ដើរៗ នៅក្នុងការស្ទង់មតិជាច្រើន ហើយជាពិសេស គឺភាពអវិជ្ជមាន ពាក់ព័ន្ធនឹងសំណួរនៃការដោះស្រាយបញ្ហាសេដ្ឋកិច្ចរបស់លោក ដែលជាចំណុចនៃមោទនភាព សម្រាប់អ្នកជំនួញដែលបានក្លាយទៅជាប្រធានាធិបតីរូបនេះ។ ហើយការធ្លាក់ចុះនូវប្រជាប្រិយភាពរបស់លោក ក៏បានជំរុញឲ្យមានការខ្វែងគំនិតគ្នាផងដែរ ក្នុងគណបក្សរបស់លោក។

សេចក្ដីស្នើច្បាប់ថវិកាដែលបញ្ចូលអាទិភាពអភិបាលកិច្ចសំខាន់ៗរបស់លោក ស្ទើរតែឆ្លងមិនផុតសភា ដោយទទួលបានសំឡេងគាំទ្រយ៉ាងស្ដួចស្ដើង កាលពីថ្ងៃទី១០ ខែមេសា ប៉ុន្តែច្បាប់នោះទទួលបានការអនម័ត បន្ទាប់ពីប្រធានសភា លោក Mike Johnson បន្តការចរចារដ៏តានតឹងជាមួយសមាជិកបក្សសាធារណរដ្ឋប្រហែល ២០នាក់ដែលជំទាស់ និងក្រោយពីលោក Trump បានព្រមានពួកគេឲ្យ «បញ្ឈប់ការទាមទារការចាប់អារម្មណ៍ ហើយបំពេញកិច្ចការរបស់ខ្លួន»។ ទោះយ៉ាងណាក្ដី សមាជិកគណបក្សសាធារណរដ្ឋ ២រូប គឺលោក Thomas Massie នៅរដ្ឋ Kentucky និងលោកស្រី Victoria Spartz នៅរដ្ឋ Indiana បានចូលរួមប្រឆាំងច្បាប់នេះជាមួយគណបក្សប្រជាធិបតេយ្យ។

ជាការអាម៉ាស់មួយទៀត សម្រាប់លោកប្រធានាធិបតី សមាជិកព្រឹទ្ធសភាមកពីបក្សសាធារណរដ្ឋចំនួន ៧រូប បានចុះហត្ថលេខាលើសេចក្ដីស្នើច្បាប់ ដែលនឹងគ្រប់គ្រងអំណាចប្រធានាធិបតីលើពន្ធគយ។ រដ្ឋធម្មនុញ្ញចែងថា អង្គនីតិបញ្ញត្តិ ពោលគឺមិនមែនអង្គនីតិប្រតិបត្តិនោះទេ ត្រូវគ្រប់គ្រងការចំណាយរបស់រដ្ឋាភិបាល។

ហើយជាបញ្ហាប្រឈមមួយផ្សេងទៀត ក្រុមអ្នកតស៊ូមតិផ្នែកច្បាប់ដែលមាននិន្នាការអភិរក្សនិយម បានដាក់ពាក្យបណ្តឹងប្រឆាំងនឹងយុត្តិកម្មនៃពន្ធគយរបស់លោក Trump ដោយអះអាងថា «ការអនុវត្តពាណិជ្ជកម្ម និងសេដ្ឋកិច្ចបរទេស បានបង្កើតជាភាពអាសន្នជាតិ»៕