ក្រសួងការបរទេសរបស់ប្រទេសនេះ បាននិយាយថា រដ្ឋាភិបាលកូរ៉េខាងត្បូង បានដាក់ទណ្ឌកម្មលើនាវាមួយគ្រឿង ក្រុមហ៊ុនពីរ រួមទាំងជនជាតិរុស្ស៊ីម្នាក់ និងបុគ្គលពីរនាក់ ជុំវិញការចោទប្រកាន់ថា បានរំលោភលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

ទណ្ឌកម្មនេះ អនុវត្តចំពោះនាវាដែលមិនបានចុះបញ្ជីឈ្មោះ Sunrise 1 ដែលដំណើរការដោយក្រុមហ៊ុន Xiangrui Shipping ដែលមានមូលដ្ឋាននៅទីក្រុងហុងកុង ក៏ដូចជាពលរដ្ឋចិនពីរនាក់ ដែលធ្វើការជាអ្នកគ្រប់គ្រងនៅក្រុមហ៊ុនដឹកជញ្ជូន។ ក្រុមហ៊ុនរុស្ស៊ី Consul DV ក៏ រងទណ្ឌកម្មផងដែរ។

ការរឹតបន្តឹងនេះ គឺទាក់ទងទៅនឹងឧបទ្ទវហេតុមួយ ដែលបានកើតឡើងកាលពីខែមិថុនា ឆ្នាំមុន នៅពេលដែលអាជ្ញាធរកូរ៉េខាងត្បូង បានឃាត់នាវា Sunrise 1 នៅក្នុងដែនទឹករបស់ពួកគេ។ តាមការត្រួតពិនិត្យគេបានរកឃើញថា មានផ្ទុករ៉ែដែកចំនួន ៥.០២០តោន។ យោងតាមកូរ៉េខាងត្បូងបានឲ្យដឹងថា នាវានេះបានចាកចេញពីកំពង់ផែ Chongjin របស់កូរ៉េខាងជើង នាពេលថ្មីៗនេះ។ សេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិហាមប្រាមការធ្វើពាណិជ្ជកម្មបែបនេះ ជាមួយក្រុងព្យុងយ៉ាង។ ក្រុមហ៊ុន  រុស្ស៊ី Consul DV ត្រូវបានចុះបញ្ជីជាក្រុមហ៊ុនបញ្ជូនទំនិញ។ អាជ្ញាធរកូរ៉េខាងត្បូង បានធ្វើការស៊ើបអង្កេតលើបញ្ហានេះ។

ដោយសារទណ្ឌកម្មនេះ ក្រុមហ៊ុនកូរ៉េខាងត្បូងឥឡូវនេះ ត្រូវតែទទួលបានការអនុញ្ញាតពីអាជ្ញាធរនៃសាធារណរដ្ឋកូរ៉េ ដើម្បីធ្វើអាជីវកម្មជាមួយបុគ្គល និងនីតិបុគ្គលដែលត្រូវផ្តល់សិទ្ធិឲ្យ។ នាវា Sunrise 1 ក៏ត្រូវតែទទួលបានការអនុញ្ញាតឲ្យចូលកំពង់ផែកូរ៉េខាងត្បូងផងដែរ។