ប្រធានាធិបតីស៊ីរី លោក Ahmed al-Sharaa បានពន្យាពេលកំណត់ ដើម្បីឲ្យគណៈកម្មាធិការស្វែងរកការពិតធ្វើរបាយការណ៍របស់ខ្លួន ស្តីពីការសម្លាប់ពលរដ្ឋសហគមន៍ឥស្លាម Alawite នៅតំបន់ឆ្នេរសមុទ្រនៃប្រទេសស៊ីរី កាលពីខែមុន ដែលជាការផ្ទុះឡើងនូវអំពើហិង្សាបង្ហូរឈាមបំផុតនៃនិកាយសាសនា គិតចាប់តាំងពីពួកឧទ្ទាមឥស្លាមនិកាយស៊ុននីដណ្តើមអំណាចបាន។

ពលរដ្ឋនៃសហគមន៍ឥស្លាម Alawite រាប់រយនាក់ ត្រូវបានសម្លាប់នៅតំបន់ឆ្នេរភាគខាងលិចប្រទេសស៊ីរីកាលពីដើមខែមីនា ដែលនោះជាការសងសឹកយ៉ាងជាក់ស្តែង ចំពោះការវាយឆ្មក់យ៉ាងសាហាវលើកងកម្លាំងសន្តិសុខថ្មីរបស់ស៊ីរីពីសំណាក់ក្រុមប្រដាប់អាវុធ ដែលស្មោះត្រង់ចំពោះអតីតប្រធានាធិបតីស៊ីរីដែលត្រូវបានទម្លាក់ពីអំណាច គឺលោក Bashar al-Assad ដែលជាអ្នកមានឈាមជ័រនៃពលរដ្ឋសហគមន៍ Alawite។

កាលពីថ្ងៃទី៩ ខែមីនា លោក Sharaa បានប្រគល់ភារកិច្ចឲ្យគណៈកម្មាធិការស្វែងរកការពិត ដោយឲ្យចេញរបាយការណ៍ ក្នុងរយៈពេល ៣០ថ្ងៃ ដែលនឹងជួយកំណត់ក្រុមជនល្មើស ហើយឲ្យពួកគេទទួលខុសត្រូវ ចំពោះការប្រព្រឹត្តិរបស់ខ្លួន។ នៅពេលត្រូវបានសួរដោយសារព័ត៌មាន Reuters ថា តើយុទ្ធជនមកពីក្រសួងការពារជាតិរបស់លោកមានជាប់ពាក់ព័ន្ធក្នុងការសម្លាប់នេះដែរ ឬអត់នោះ លោកបានឆ្លើយថា វាអាស្រ័យលើគណៈកម្មាធិការស្វែងរកភស្តុតាង។

នៅក្នុងក្រឹត្យមួយដែលបានចេញផ្សាយកាលពីល្ងាចថ្ងៃព្រហស្បតិ៍ (ទី១០ ខែមេសា) លោក Sharaa បានលើកឡើងថា គណៈកម្មាធិការបានស្នើសុំពេលវេលាបន្ថែមទៀត ដើម្បីបញ្ចប់ការងាររបស់ខ្លួន ហើយថា លោកនឹងផ្តល់ឲ្យក្រុមពិសេសនេះនូវរយៈពេល ៣ខែទៀតតែម្ដងប៉ុណ្ណោះ៕