ការគាំទ្រ ចំពោះបេក្ខជនប្រជែងតំណែងប្រធានាធិបតីកូរ៉េខាងត្បូង គឺលោក Lee Jae-myung បានកើនឡើងដល់កម្រិតខ្ពស់រយៈពេល ៣ខែ ខណៈដែលលោកបន្តការនាំមុខលើបេក្ខជនអភិរក្សនិយម ជាសញ្ញាមួយដែលបង្ហាញថា គណបក្សប្រឆាំង គឺបក្សប្រជាធិបតេយ្យ (DP) អាចដណ្តើមបានអំណាច នៅក្នុងការបោះឆ្នោតទូទាំងប្រទេស នៅថ្ងៃទី៣ ខែមិថុនា។

ការស្ទង់មតិចុងក្រោយបំផុតរបស់ស្ថាប័ន Gallup ដែលបានចេញផ្សាយនៅថ្ងៃសុក្រ (ទី១១ ខែមេសា) នេះ បានបង្ហាញថា ការគាំទ្រចំពោះលោក Lee ដែលលម្អៀងទៅនិន្នាការឆ្វេងនិយម បានកើនឡើងដល់ ៣៧ភាគរយ ដោយឡើង ៣ភាគរយពីការស្ទង់មតិ កាលពីសប្តាហ៍មុន។

នេះគឺជាការស្ទង់មតិលើកដំបូងដែលត្រូវបានធ្វើឡើង គិតចាប់តាំងពីអតីតប្រធានាធិបតី លោក Yoon Suk Yeol ត្រូវបានដកចេញពីតំណែង ដោយសារការប្រថុយប្រថានចេញច្បាប់អាជ្ញាសឹករបស់លោក ហើយបានបង្ហាញថា ការគាំទ្រ ចំពោះគណបក្សរបស់លោក Lee បានកើនឡើងដល់ ៤១ភាគរយ ខណៈដែលសំឡេងពេញចិត្តគណបក្សកាន់អំណាច គឺបក្ស People Power Party (PPP) ធ្លាក់ចុះមកត្រឹម ៣០ភាគរយ។

ការស្ទង់មតិត្រូវបានធ្វើឡើងក្នុងចំណោមអ្នកឆ្លើយសំណួរចំនួន ១.០០៥នាក់ នៅទូទាំងប្រទេស ហើយមានកម្រិតល្អៀងគ្នា ៣,១ភាគរយ។

ការបញ្ចប់តំណែងលោក Yoon ផ្តល់ឲ្យបេក្ខជនសេរីនិយមនូវអត្ថប្រយោជន៍ជាងគេ នៅក្នុងការបោះឆ្នោតបន្ទាប់ ដែលអាចនាំទៅរកដំណាក់កាលផ្លាស់ប្តូរគោលនយោបាយទាំងផ្នែកសេដ្ឋកិច្ច និងសង្គមកាន់តែប្រសើរឡើង៕