អ្នកនាំពាក្យសហភាពអឺរ៉ុប (EU) បាននិយាយថា ស្នងការពាណិជ្ជកម្មអឺរ៉ុប លោក Maros Sefcovic នឹងធ្វើដំណើរទៅកាន់ទីក្រុងវ៉ាស៊ីនតោន នៅថ្ងៃអាទិត្យ (ទី១៣ ខែមេសា) ហើយនឹងជួបពិភាក្សាជាមួយមន្ត្រីសហរដ្ឋអាមេរិក នៅថ្ងៃចន្ទ ក្នុងគោលបំណងឲ្យបានឈានដល់កិច្ចព្រមព្រៀងលើបញ្ហាពន្ធគយ។

ប្រធានាធិបតីអាមេរិក លោក Donald Trump កាលពីថ្ងៃពុធ បានប្រកាសពីការកាត់បន្ថយកាតព្វកិច្ចពន្ធធ្ងន់ធ្ងរ ដែលលោកទើបតែដាក់លើ EU និងប្រទេសរាប់សិបផ្សេងទៀត។ EU បាននិយាយកាលពីថ្ងៃព្រហស្បតិ៍ថា ខ្លួននឹងផ្អាកវិធានការពន្ធតបតទាំងអស់។

អ្នកនាំពាក្យគណៈកម្មការពាណិជ្ជកម្មអឺរ៉ុប លោក Olof Gill បានប្រាប់វិទ្យុ RTE របស់ប្រទេសអៀរឡង់នៅថ្ងៃសុក្រ (ទី១១ ខែមេសា) នេះថា៖ «ស្នងការពាណិជ្ជកម្ម នឹងធ្វើដំណើរទៅទីក្រុងវ៉ាស៊ីនតោន ដើម្បីប្រឹងប្រែងឲ្យបានឈានដល់កិច្ចព្រមព្រៀងមួយចំនួន។ នោះគឺជាអ្វីដែលយើងកំពុងផ្តោតលើ»។ លោកបានបន្ថែមថា៖ «ប្រសិនបើគ្រប់យ៉ាងមិនទទួលបានលទ្ធផលល្អទេនោះ ជម្រើសគ្រប់យ៉ាងត្រូវលើកយកមកពិភាក្សា»។

លោក Gill បាននិយាយថា វាមិនច្បាស់ទាំងស្រុងពីអ្វីដែលសហរដ្ឋអាមេរិក កំពុងចង់បានពី EU នោះទេ ប៉ុន្តែថា ការផ្អាកអនុវត្តអត្រាពន្ធ មានន័យថា ភាគីទាំង២ «ស្ថិតនៅក្នុងទីតាំងមួយ ដែលយើងពិតជាអាច ឆ្ពោះទៅរកវឌ្ឍនភាពពិតប្រាកដមួយចំនួន»។ លោកបានបញ្ជាក់ថា៖ «យើងមានការផ្តល់ជូនជាច្រើន ហើយយើងត្រៀមខ្លួនជាស្រេច ដើម្បីពិភាក្សា»៕