ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃសុក្រ ថា គោលនយោបាយដំឡើងពន្ធរបស់លោកកំពុងដំណើរការដែលនឹងផ្តល់ប្រយោជន៍ដល់សហរដ្ឋអាមេរិក និងពិភពលោក ទោះបីជាប្រទេសចិន បានដំឡើងពន្ធលើទំនិញអាមេរិករហូតដល់១២៥ភាគរយ នៅក្នុងសង្គ្រាមពាណិជ្ជកម្មកាន់តែជ្រៅក៏ដោយ។

ទីផ្សារភាគហ៊ុនដែលទទួលរងផលប៉ះពាល់ ប្រាក់ដុល្លារធ្លាក់ថ្លៃ ហើយមូលបត្របំណុលរដ្ឋាភិបាលសហរដ្ឋអាមេរិកបានប្រឈមនឹងសម្ពាធជាថ្មី បន្ទាប់ពីការសងសឹករបស់ទីក្រុងប៉េកាំង បានបង្កើនការប្រឈម ដាក់គ្នារវាងប្រទេសដែលមានសេដ្ឋកិច្ចធំបំផុតទាំងពីររបស់ពិភពលោក។

នៅក្នុងសារមួយកាលពីថ្ងៃសុក្រនៅលើបណ្តាញផ្សព្វផ្សាយសង្គម លោក Trump បាននិយាយថា «យើងកំពុងធ្វើបានយ៉ាងល្អលើគោលនយោបាយដំឡើងពន្ធរបស់យើង» «ជាភាពពេញចិត្តសម្រាប់អាមេរិក និងពិភពលោក ហើយវាកំពុងដំណើរការយ៉ាងលឿន»។ 

លោក Trump បានធ្វើឲ្យទីផ្សារហិរញ្ញវត្ថុពិភពលោកធ្លាក់ចូលទៅដំណើរការយឺតយ៉ាវដោយការប្រកាសពីការដំឡើងពន្ធលើការនាំចូលពីប្រទេសរាប់សិបកាលពីសប្តាហ៍មុន។