ប្រធានាធិបតីចិន លោក Xi Jinping បានរិះគន់សហរដ្ឋអាមេរិក ក្នុងពេលមានភាពវឹកវរផ្នែកពាណិជ្ជកម្មដែលកំពុងកើតឡើង។ លោក បាននិយាយថា នឹងគ្មានអ្នកឈ្នះក្នុងសង្គ្រាមដំឡើងពន្ធនេះទេ។ ការអត្ថាធិប្បាយរបស់លោកបានធ្វើឡើង ខណៈប្រទេសចិនបានដំឡើងពន្ធលើមុខទំនិញរបស់អាមេរិករហូតដល់១២៥ ភាគរយ។

លោក Xi បាននិយាយក្នុងអំឡុងពេលជួបជាមួយនាយករដ្ឋមន្ត្រីអេស្ប៉ាញ លោក Pedro Sanchez ក្នុងទីក្រុងប៉េកាំង កាលពីថ្ងៃសុក្រ។ លោក បាននិយាយបន្តថា ការចំណាត់ការរបស់ទីក្រុងវ៉ាស៊ីនតោនប្រឆាំងនឹងពិភពលោក នឹងនាំទៅរកភាពឯកោតែខ្លួនឯងប៉ុណ្ណោះ។ មេដឹកនាំចិនរូបនេះ បានសង្កត់ធ្ងន់ថា ប្រទេសរបស់លោកគឺជាប្រទេសមហាអំណាចសេដ្ឋកិច្ច ដោយចំនួនប្រជាជនច្រើន និងសក្តានុពលឧស្សាហកម្មដែលអាចទ្រទ្រង់សេដ្ឋកិច្ចពិភពលោក។ លោកបានអំពាវនាវឲ្យប្រទេសចិន និងសហភាពអឺរ៉ុប ធ្វើការជាមួយគ្នាដើម្បីទប់ទល់ទៅនឹង «ការគំរាមកំហែងឯកតោភាគី»។

លោក Lin Jian អ្នកនាំពាក្យក្រសួងការបរទេសចិន បានព្រមានថា ទីក្រុងប៉េកាំងត្រៀមខ្លួនជាស្រេចដើម្បីទប់ទល់រឿងនេះ។ «វិធានការប្រឆាំងការគំរាមកំហែងពីសហរដ្ឋអាមេរិក គឺដើម្បីការពារសិទ្ធិ និងផលប្រយោជន៍ស្របច្បាប់របស់យើង ការពារច្បាប់និងសណ្តាប់ធ្នាប់អន្តរជាតិ និងការពារផលប្រយោជន៍រួមនៅជុំវិញពិភពលោក។