ប្រធានាធិបតីអាមេរិក លោក Donald Trump កាលពីថ្ងៃសៅរ៍ (ទី១២ ខែមេសា) បាននិយាយថា កិច្ចពិភាក្សា ដែលត្រូវបានធ្វើឡើង ក្នុងគោលបំណងបញ្ចប់សង្រ្គាមនៅប្រទេសអ៊ុយក្រែន អាចនឹងដំណើរការទៅយ៉ាងល្អប្រសើរ ប៉ុន្តែមានចំណុចដែល «ត្រូវចាត់វិធានការ ដោយមិនត្រឹមតែពិភាក្សាប៉ុណ្ណោះទេ»។

មួយថ្ងៃបន្ទាប់ពីលោកបានបង្ហាញពីការខកចិត្តជាមួយរុស្ស៊ី លោក Trump បានធ្វើអត្ថាធិប្បាយទៅកាន់អ្នកសារព័ត៌មាន ហើយបានប្រាប់ប្រទេសនេះឲ្យ «ចាប់ផ្ដើមចាត់វិធានការ» ជុំវិញការឈានដល់កិច្ចព្រមព្រៀងមួយ។

លោក Trump បានប្រាប់អ្នកសារព័ត៌មាននៅលើយន្តហោះ Air Force One ថា៖ «ខ្ញុំគិតថា ស្ថានភាពអ៊ុយក្រែន-រុស្ស៊ី ប្រហែលជាដំណើរការទៅដោយល្អប្រសើរ ហើយអ្នកនឹងបានឃើញអ្វីកើតឡើងក្នុងពេលឆាប់ៗនេះ។ មានចំណុចដែលមិនគ្រាន់តែពិភាក្សាប៉ុណ្ណោះទេ តែត្រូវចាត់វិធានការ ហើយយើងនឹងឃើញអ្វីដែលកើតឡើង ប៉ុន្តែខ្ញុំគិតថា ស្ថានភាពដំណើរការទៅយ៉ាងល្អប្រសើរ»។

គួរបញ្ជាក់ថា កាលពីថ្ងៃទី១១ ខែមេសា បេសកជនពិសេសរបស់លោក Trump គឺលោក Steve Witkoff បានជួបពិភាក្សាជាមួយប្រធានាធិបតីរុស្ស៊ី លោក Vladimir Putin អំពីការស្វែងរកកិច្ចព្រមព្រៀងសន្តិភាព។

កិច្ចពិភាក្សានេះបានកើតឡើងនៅពេលដែលកិច្ចសន្ទនា រវាងសហរដ្ឋអាមេរិក និងរុស្ស៊ី ក្នុងគោលបំណងឲ្យមានការព្រមព្រៀងបទឈប់បាញ់ មុនពេលកិច្ចព្រមព្រៀងសន្តិភាពអាចកើតឡើង ដើម្បីបញ្ចប់សង្គ្រាមនោះ ហាក់ដូចជាបានជាប់គាំង ដោយសារការខ្វែងគំនិតគ្នា ជុំវិញលក្ខខណ្ឌ សម្រាប់ការផ្អាកទាំងស្រុង នៅក្នុងអរិភាពនេះ៕