វ៉ូវីណាម៖ សហព័ន្ធកីឡាវ៉ូវីណាមកម្ពុជាបានចុះអនុស្សរណៈយោគយល់គ្នា (MOU) ស្ដីពីកិច្ចសហប្រតិបត្តិការអភិវឌ្ឍន៍វិស័យកីឡាវ៉ូវីណាមកម្ពុជារយៈពេល ៣ឆ្នាំជាមួយសមាគមសេដ្ឋកិច្ចចិនខ្មែរក័ងតុង។ ពិធីចុះ MOU នេះបានធ្វើឡើងក្រោមវត្តមានប្រធានសហព័ន្ធឯកឧត្ដម អ៊ូ រតនា ប្រធានសហព័ន្ធ និងប្រធានសមាគមលោក Chhay Jinh Yi កាលពីចុងសប្ដាហ៍កន្លងទៅ។
ឯកឧត្ដម អ៊ូ រតនា បានបង្ហាញក្ដីរីករាយជាខ្លាំងចំពោះកិច្ចសហប្រតិបត្តិការមួយនេះ ដែលនឹងក្លាយជាកម្លាំងចលករថ្មីមួយទៀតក្នុងការរួមចំណែកអភិវឌ្ឍន៍វិស័យកីឡាកម្ពុជា ពិសេសកីឡាវ៉ូវីណាម ហើយឯកឧត្ដមបានប្ដេជ្ញាយកការឧបត្ថម្ភគាំទ្រទាំងអស់ ទៅប្រើប្រាស់ឲ្យចំទិសដៅក្នុងន័យអភិវឌ្ឍន៍វិស័យកីឡាកម្ពុជា ពិសេសបម្រើឲ្យដំណើរឆ្ពោះទៅស៊ីហ្គេមឆ្នាំ២០២៣ នៅកម្ពុជា។ ចំណែកលោក Chhay Jinh Yi ក៏បានសម្ដែងសេចក្ដីសោមនស្សរីករាយ ដែលបានរួមចំណែកជួយដល់វិស័យកីឡាកម្ពុជា ដែលកំពុងត្រៀមធ្វើម្ចាស់ផ្ទះស៊ីហ្គេមឆ្នាំ២០២៣ បន្ថែមលើអ្វីៗដែលរដ្ឋាភិបាលចិន និងប្រជាជនចិនធ្លាប់បានជួយកម្ពុជាកន្លងមក។ ម្យ៉ាងវិញទៀតលោកថា ការចុះ MOU ជួយកីឡាវ៉ូវីណាមនេះក៏ដូចជាការតបស្នងចំពោះរាជរដ្ឋាភិបាលកម្ពុជា ពីសំណាក់អ្នកវិនិយោគចិន ក្រោយការរកស៊ី និងរីកចម្រើននៅកម្ពុជាផងដែរ។
សូមបញ្ជាក់ថា ជំហានដំបូងនៃការចុះ MOU រវាងសហព័ន្ធកីឡាវ៉ូវីណាមកម្ពុជា និងសមាគមសេដ្ឋកិច្ចចិនខ្មែរក័ងតុងនេះគឺមានរយៈពេល ៣ឆ្នាំ តែថ្នាក់ដឹកនាំសហព័ន្ធរំពឹងថា កិច្ចសហប្រតិបត្តិការមួយនេះនឹងបន្ដទៅមុខជាយូរអង្វែងទៀត។ កិច្ចសហប្រតិបត្តិការមួយនេះ សមាគមផ្ដោតការគាំទ្រទាំងថវិកា និងសម្ភារៈតាមតម្រូវការចាំបាច់របស់សហព័ន្ធ បន្ថែមលើការឧបត្ថម្ភគាំទ្ររបស់ក្រុមជម្រើសជាតិ ដើម្បីសម្រួចទិសដៅឆ្ពោះទៅរកជោគជ័យនៅស៊ីហ្គេមឆ្នាំ២០២៣ និងព្រឹត្តិការណ៍អន្ដរជាតិធំៗបន្ថែមទៀត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
