កាលពីថ្ងៃចន្ទម្សិលមិញ ប្រធានាធិបតីចិនលោក Xi Jinping មាននូវជំនួបជាមួយនាយករដ្ឋមន្រ្តី វៀតណាមលោក Pham Minh Chinh ដើម្បីពង្រឹងទំនាក់ទំនងពាណិជ្ជកម្មជាមួយប្រទេសនៅអាស៊ីអាគ្នេយ៍មួយនេះ ស្របពេលមានភាពតានតឹងដំឡើងពន្ធជាមួយសហរដ្ឋអាមេរិក ។

វៀតណាមដែលជាការឈប់សំចតលើកដំបូងនៃដំណើរទស្សនកិច្ច ៣ប្រទេសនៅអាស៊ីអាគ្នេយ៍របស់លោក Xi នោះ បានចុះហត្ថលេខាកលើកិច្ចព្រមព្រៀងសហប្រតិបត្តិការជាច្រើនជាមួយចិនកាលពីថ្ងៃចន្ទ រួមទាំងខ្សែសង្វាក់ផលិតកម្ម និងផ្គត់ផ្គង់ ក៏ដូចជាកិច្ចសហប្រតិបត្តិការផ្លូវរថភ្លើង ។

លោក Xi បានធ្វើដំណើរទៅដល់ទីក្រុងហាណូយ រដ្ឋធានីប្រទេសវៀតណាមកាលពីថ្ងៃចន្ទសម្រាប់ដំណើរទស្សនកិច្ចផ្លូវរដ្ឋរយៈពេល ២ថ្ងៃ ។

តបតាមការអញ្ជើញរបស់អគ្គលេខាគណៈកម្មាធិការមជ្ឈិមបក្សកុម្មុយនិស្តវៀតណាម លោក To Lam និងប្រធានាធិបតីនៃសាធារណៈរដ្ឋសង្គមនិយមវៀតណាម លោក Luong Cuong លោក Xi ស្ថិតក្នុងដំណើរទស្សនកិច្ចផ្លូវរដ្ឋនៅប្រទេសវៀតណាម ចាប់ពីពីថ្ងៃចន្ទ ដល់ថ្ងៃអង្គារ។

ក្នុងដំណើរទស្សនកិច្ចនេះ លោក Xi បានជួបពិភាក្សាជាមួយអគ្គលេខាបក្ស លោក To Lam និងជួបជាមួយប្រធានាធិបតីលោក Luong Cuong និងប្រធានរដ្ឋសភាលោក Tran Thanh Man ។

ដំណើរទស្សនកិច្ចរបស់លោក Xi កើតមានឡើង ស្របពេលខួបលើកទី ៧៥នៃទំនាក់ទំនងការទូតរវាងចិន និងវៀតណាម ។

លោក Xi នឹងបន្តដំណើរទៅកាន់ប្រទេសម៉ាឡេស៊ី និងព្រះរាជាណាចក្រកម្ពុជា សម្រាប់ដំណើរទស្សនកិច្ចផ្លូវរដ្ឋ ចាប់ពីថ្ងៃអង្គារ ដល់ថ្ងៃសុក្រ ៕