មន្រ្តីក្នុងតំបន់របស់អ៊ុយក្រែន និយាយថា ការវាយប្រហារយានដ្រូនរបស់រុស្ស៊ី បណ្តាលឲ្យមនុស្ស ៨នាក់រងរបួសនៅទីក្រុង Odesa ស្ថិតក្នុងសមុទ្រខ្មៅ កាលពីយប់កន្លងទៅ ។

លោក Oleh Kiper គឺជាអភិបាលតំបន់ Odesa និយាយថា ផ្ទះសម្បែងប្រជាពលរដ្ឋជាច្រើនខ្នង មណ្ឌលសុខភាព ឃ្លាំងស្តុកទំនិង បានរងការខូចខាត ក្នុងការវាយប្រហារនេះ ។

ការវាយប្រហាររបស់រុស្ស៊ីកាលពីយប់កន្លងទៅ បណ្តាលឲ្យកើតមានអគ្គិភ័យផងដែរនៅស្ថានីយ៍ប្រេង ស្ថិតក្នុងទីក្រុង Zaporizhzhia ។

ការវាយប្រហារនេះដែរ បានកើតមានឡើង រយៈពេល ១ថ្ងៃប៉ុណ្ណោះ ក្រោយមីស៊ីលរុស្ស៊ី ២គ្រាប់ បានប្រហារកណ្តាលទីក្រុងភាគខាងជើង Sumy របស់អ៊ុយក្រែន ដោយបានសម្លាប់មនុស្ស ៣៤នាក់ និងមនុស្ស ១១៧នាក់ផ្សេងទៀត រងរបួស នៅក្នុងការវាយប្រហារស្លាប់មនុស្សច្រើនបំផុតនៅឆ្នាំនេះ ។

ប្រធានាធិបតី លោក Volodymyr Zelenskyy បានទាមទារឲ្យមានការឆ្លើយតបយ៉ាងខ្លាំងក្លាពីអន្តរជាតិប្រឆាំងទីក្រុងម៉ូស្គូ ជុំវិញការវាយប្រហារនេះ ដែលបានកើតឡើងជាមួយគ្នានឹងការជំរុញរបស់ប្រធានាធិបតីសហរដ្ឋអាមេរិក លោក Donald Trump ដើម្បីបញ្ចប់សង្រ្គាមឲ្យបានឆាប់រហ័សដែលកំពុងតែព្យាយាមឈានដល់ការទម្លាយភាពទាល់ច្រក។

នៅក្នុងវីដេអូបង្ហោះដោយ លោក Zelenskyy នៅលើបណ្តាញសង្គមបានបង្ហាញសាកសពត្រូវបានដាក់គរនៅតាមដងផ្លូវក្នុងទីក្រុងក្បែររថយន្តក្រុងដែលត្រូវបានបំផ្លាញ និងរថយន្តដែលឆេះខ្លោច ។ លោកបាននិយាយថា «មានតែមនុស្សទុច្ចរិតប៉ុណ្ណោះ ដែលអាចប្រព្រឹត្តរឿងបែបនេះបាន៕