នគរបាលចិននៅទីក្រុង Harbin ភាគឦសាន បានចោទទីភ្នាក់ងារសន្តិសុខជាតិអាមេរិក (NSA) ថា បានបើកការវាយប្រហារតាមអ៊ីនធឺណិតកម្រិតខ្ពស់ ក្នុងអំឡុងពេលព្រឹត្តិការណ៍ប្រកួតកីឡា Asian Winter Games ក្នុងខែកុម្ភៈ ដោយផ្តោតលើឧស្សាហកម្មសំខាន់ៗ។

នគរបាល បានបន្ថែមភ្នាក់ងារ NSA បីនាក់ ដែលត្រូវបានចោទប្រកាន់ទៅក្នុងបញ្ជីអ្នកដែលគេត្រូវរតាមស្វែងរកចាប់ខ្លួន ហើយថែមទាំងបានចោទប្រកាន់សាកលវិទ្យាល័យ University of California និង University of Virginia Tech ថា បានជាប់ពាក់ព័ន្ធក្នុងការវាយប្រហារ បន្ទាប់ពីធ្វើការស៊ើបអង្កេត។ នេះបើយោងតាមរបាយការណ៍របស់ទីភ្នាក់ងារសារព័ត៌មានរដ្ឋស៊ីនហ៊ួ នៅថ្ងៃអង្គានេះ។

ភ្នាក់ងារ NSA ត្រូវបានកំណត់អត្តសញ្ញាណដោយសារព័ត៌មានស៊ីនហួ ដូចជាលោក Katheryn A. Wilson, លោក Robert J. Snelling និង លោក Stephen W. Johnson ។ អ្នកទាំងបី ក៏ត្រូវបានគេរកឃើញថា បានធ្វើការវាយប្រហារតាមអ៊ីនធឺណិតម្តងហើយម្តងទៀតលើហេដ្ឋារចនាសម្ព័ន្ធព័ត៌មានសំខាន់ៗរបស់ប្រទេសចិន និងបានចូលរួមក្នុងការវាយប្រហារតាមអ៊ីនធឺណិតលើក្រុមហ៊ុន Huawei និងសហគ្រាសដទៃទៀត។

សារព័ត៌មាននេះ មិនបានបញ្ជាក់ថាតើសាកលវិទ្យាល័យអាមេរិកទាំងពីរ មានការពាក់ព័ន្ធយ៉ាងណានោះទេ។

ស្ថានទូតអាមេរិកប្រចាំប្រទេសចិន មិនបានឆ្លើយតបភ្លាមៗចំពោះសំណើសុំការអត្ថាធិប្បាយ តាមអ៊ីមែលទេ។

ការចោទប្រកាន់លម្អិតនេះ បានកើតឡើង នៅពេលដែលប្រទេសសេដ្ឋកិច្ចធំជាងគេទាំងពីរ បានបន្តធ្លាក់ចូលទៅក្នុងសង្គ្រាមពាណិជ្ជកម្ម ដែលជំរុញឲ្យមានការព្រមានអំពីការធ្វើដំណើររួចហើយសម្រាប់ភ្ញៀវទេសចរចិន ដែលទៅសហរដ្ឋអាមេរិក និងបានបញ្ឈប់ការនាំចូលខ្សែភាពយន្តអាមេរិក ទៅកាន់ប្រទេស ចិន។