ក្រុមអាជីវករលក់ដូរក្នុងឱកាសបុណ្យចូលឆ្នាំប្រពៃណីខ្មែរ សង្ក្រាន្តវត្តភ្នំ បានបង្ហាញនូវអារម្មណ៍សប្បាយរីករាយ ខណៈនៅក្នុងឆ្នាំ នេះ មានប្រជាពលរដ្ឋមកលេងកម្សាន្តជាច្រើន ធ្វើឲ្យលក់ដូររបស់ពួកគាត់ លក់ដាច់កាក់កបយ៉ាងខ្លាំង និងទទួលបានចំណូលសមរម្យ។

អាជីវករលក់ដូរនៅក្នុងថ្ងៃបុណ្យចូលឆ្នាំប្រពៃណីខ្មែរ សង្ក្រាន្តវត្តភ្នំនៅក្នុងថ្ងៃទី២ ឆ្នាំ២០២៥នេះ បានលើកឡើងឲ្យដឹងថា នៅ ក្នុងឆ្នាំនេះ ឃើញថា បន្ទាប់ពីស្ថានភាពជំងឺកូវីដ-១៩ មានសភាពល្អប្រសើរក្នុងរយៈពេល២ឆ្នាំកន្លងមក និងស្របពេលស្ថានភាព អាជីវកម្ម សិប្បកម្ម និងការលក់ដូររបស់ប្រជាពលរដ្ឋក្នុងស្រុក បានកំពុងដំណើរការឡើងវិញ ជាពិសេសប្រជាពលរដ្ឋអាចរកចំណូល បានឡើងវិញជាធម្មតា បានធ្វើឲ្យពួកគាត់ចេញដើរកម្សាន្តជាហូរហែរ ជាពិសេសនៅក្នុងសង្ក្រាន្តវត្តភ្នំក្នុងឆ្នាំនេះជាដើម ដោយមាន ប្រជាពលរដ្ឋចូលរួមយ៉ាងច្រើនកុះករ។

អាជីវករទាំងនេះ លើកឡើងស្រដៀងគ្នាទៀតថា សង្ក្រាន្តវត្តភ្នំឆ្នាំនេះ គិតមកដល់ថ្ងៃកណ្តាល នៃថ្ងៃបុណ្យចូលឆ្នាំប្រពៃណីខ្មែរ អាជីវករដែលលក់វត្ថុអនុស្សាវរីយិ៍ ជាពិសេសការលក់នំចំណីរ និងម្ហូបអាហារហូបចុកផ្សេងៗ បានលក់ដាច់យ៉ាងខ្លាំង ហើយនៅថ្ងៃ ចូលឆ្នាំទី៣ស្អែកនេះ ពួកគាត់អាចនឹងអស់របស់លក់ដូច ខណៈនៅថ្ងៃទី២នេះ ប្រជាពលរដ្ឋបានសម្រុកចូលទិញយ៉ាងខ្លាំង។ នេះជា ការ ចូលរួមចំណែកផ្គត់ផ្គង់ដល់ការហូបចុក ជូនដល់ប្រជាពលរដ្ឋដើរកម្សាន្ត និងក៏ជាការស្វែងរកប្រាក់ចំណូលសម្រាប់គ្រួសារ របស់ពួកគាត់ ក៏ដូចជាការចូលរួមចំណែកក្នុងពិធីថ្ងៃបុណ្យចូលឆ្នាំប្រពៃណីខ្មែរផងដែរ។

សូមបញ្ជាក់ថា នៅក្នុងពិធីបុណ្យចូលឆ្នាំប្រពៃណីខ្មែរក្នុងឆ្នាំនេះ រាជរដ្ឋាភិបាលបានជំរុញឲ្យអាជ្ញាធរតាមបណ្តារាជធានី-ខេត្ត រៀបចំ សង្ក្រាន្តនៅតាមមូលដ្ឋាន និងវត្តអារាមនានា ដើម្បីអបអរសាទរនៅក្នុងឱកាសបុណ្យចូលឆ្នាំប្រពៃណីខ្មែរ និងដើម្បីឲ្យប្រជាពលរដ្ឋបាន ចូលរួមកម្សាន្ត ជាក់ស្តែងនៅក្នុងព្រឹត្តិការណ៍សង្ក្រាន្តវត្តភ្នំឆ្នាំនេះ ឃើញថា មានបងប្អូនក្រុមអាជីវករចូលរួមលក់ដូរជាហូរហែរ នេះជា ការចូលរួមផ្សព្វផ្សាយនូវផលិតផលខ្មែរ ដើម្បីស្វែងរកការគាំទ្របន្ថែម ។ ការចូលរួមគាំទ្ររបស់ប្រជាពលរដ្ឋ គឺជាការចចូលរួម លើកកម្ពស់ផលិតផលក្នុងស្រុក ការបង្កើតការងារ និងប្រាក់ចំណូលផងដែរ។

សូមបញ្ជាក់ថា សម្រាប់សង្គ្រាន្តវត្តភ្នំឆ្នាំ២០២៥នេះ ក្រៅពីការលក់ដូរ គណៈកម្មាការក៏បានរៀបចំនូវព្រឹត្តិការណ៍ផ្សេងៗជាច្រើនទៀត ដូចជា៖ ការដាក់តាំងបង្ហាញ ក៏ដូចជាការផ្សព្វផ្សាយនូវសម្បត្តិវប្បធម៌ អរិយធម៌ នៃសារៈមន្ទីរ និងបេតិកភណ្ឌ និងការលេងល្បែង ប្រជាប្រិយផ្សេងៗ ជាពិសេសការរាំកម្សាន្តទទួលវេតាឆ្នាំឆ្នាំថ្មីជាដើម៕ អត្ថបទ៖ សុន រ៉ាឌី,