មនុស្សជាង ៤០០នាក់ ត្រូវបានសម្លាប់នៅក្នុងការវាយប្រហារនាពេលថ្មីៗនេះ ដោយកងកម្លាំងយោធាប៉ារ៉ាគាំទ្ររហ័ស(RSF) របស់ប្រទេសស៊ូដង់ នៅតំបន់ Darfur ភាគខាងលិច។ នេះបើយោងតាមប្រភពដែលដកស្រង់សម្តីដោយអង្គការសហប្រជាជាតិ។

កងកម្លាំង RSF ដែលបានធ្វើសង្រ្គាមជាមួយកងទ័ពធម្មតា ចាប់តាំងពីខែមេសា ឆ្នាំ ២០២៣ ក្នុងរយៈពេលប៉ុន្មានសប្តាហ៍ថ្មីៗនេះ បានបង្កើនការវាយប្រហាររបស់ខ្លួនលើជំរំជនភៀសខ្លួន នៅជុំវិញទីក្រុង El-Fasher ក្នុងកិច្ចខិតខំប្រឹងប្រែងរបស់ខ្លួន ដើម្បីដណ្តើមយករដ្ឋធានីរដ្ឋចុងក្រោយ នៅតំបន់ Darfur ដែលមិនស្ថិតនៅក្រោមការគ្រប់គ្រងរបស់ខ្លួនមនេះ។

ចាប់តាំងពីចុងសប្តាហ៍មុន កងកម្លាំង RSF បានចាប់ផ្តើមការវាយលុកតាមផ្លូវគោក និងតាមអាកាសទៅលើទីក្រុង El-Fasher និងជំរំជម្លៀស Zamzam និង Abu Shouk ដែលនៅក្បែរនោះ។

អ្នកនាំពាក្យអ្នកស្រី Ravina Shamdasani បានប្រាប់សារព័ត៌មាន AFP ថា គិតត្រឹមចន្លោះថ្ងៃព្រហស្បតិ៍ និងថ្ងៃសៅរ៍សប្តាហ៍មុន ការិយាល័យសិទ្ធិមនុស្សរបស់អង្គការសហប្រជាជាតិ «បានផ្ទៀងផ្ទាត់ចំនួនអ្នកស្លាប់ គឺ ១៤៨នាក់»។