អាជ្ញាធរបាននិយាយថា ក្រុមអ្នកតវ៉ាមូស្លីម ដែលបានផ្ទុះកំហឹងដោយច្បាប់ថ្មីស្តីពីការប្រើប្រាស់ដីធ្លី បានដុតរថយន្តនគរបាល ហាងទំនិញ និងផ្ទះរបស់ក្រុមអ្នកកាន់សាសនាហិណ្ឌូ បន្ទាប់ពីអំពើហិង្សាកាលពីចុងសប្តាហ៍ នៅក្នុងរដ្ឋ West Bengal ភាគខាងកើតនៃប្រទេសឥណ្ឌា បានឆក់យកជីវិតមនុស្ស ៣នាក់។

ភាពចលាចល បានចាប់ផ្តើមនៅក្នុងស្រុក Murshidabad ដោយបង្ខំឲ្យអាជ្ញាធរផ្អាកសេវាកម្មអ៊ីនធឺណិតនៅក្នុងតំបន់។

កាលពីថ្ងៃចន្ទ (ទី១៤ ខែមេសា) ក្រុមអ្នកតវ៉ានៅទីក្រុង Kolkata និងសង្កាត់ South 24 Parganas បានប៉ះទង្គិច ជាមួយនគរបាល បន្ទាប់ពីមន្រ្តី បានព្យាយាមបញ្ឈប់ការប្រមូលផ្តុំតវ៉ា។ ផ្លូវហាយវេដ៏សំខាន់មួយ ត្រូវបានបិទ ដោយក្រុមអ្នកតវ៉ាអំឡុងពេលមានភាពវឹកវរ។

ក្រុមអ្នកតវ៉ាបានខឹងសម្បាចំពោះច្បាប់ថ្មី ដែលបានអនុម័តដោយសភាឥណ្ឌា ក្នុងខែនេះ ដែលធ្វើឲ្យមានការផ្លាស់ប្តូរយ៉ាងទូលំទូលាយ ក្នុងការគ្រប់គ្រងដីដ៏ច្រើនសន្ធឹកសន្ធាប់ ដែលទុកសម្រាប់តែមូស្លីមប្រើប្រាស់ ដោយបានបង្កមានភាពតានតឹងយ៉ាងខ្លាំងរវាងរដ្ឋាភិបាល និងជនជាតិភាគតិចមូស្លីម។

ក្រុមមូស្លីម និងគណបក្សនយោបាយមួយចំនួន និយាយថា ច្បាប់នេះដូចជាគោលនយោបាយជាច្រើនរបស់លោកនាយករដ្ឋមន្ត្រី ណារិនដ្រា ម៉ូឌី (Narendra Modi) មានបំបែកបំបាក់ និងរើសអើងប្រឆាំងនឹងក្រុមអ្នកកាន់សាសនាមូស្លីម។ លោក ម៉ូឌី និងមន្ត្រីនៅក្នុងគណបក្សរបស់លោក បដិសេធការចោទប្រកាន់នេះ ហើយបាននិយាយថា ច្បាប់នេះ គឺជា «កំណែទម្រង់ដែលគាំទ្រមូស្លីម»។