ភ្នំពេញ៖ ក្រុមនិស្សិត និស្សិតអាហារូបករណ៍សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ហៅថានិស្សិត អ.ម.ត ដែលមាន សម្ដេចធិបតី ហ៊ុន ម៉ាណែត ជាប្រធានកិត្តិយស និងលោកជំទាវបណ្ឌិត ពេជ ចន្ទមុន្នី ជាប្រធានកម្មាធិការអាហារូបករណ៍សិស្ស-និស្សិតក្រីក្រ សម្ដេចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត និងជាប្រធានសមាគម អ.ម.ត បានរៀបចំកម្មវិធីអាហារសាមគ្គីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធស័ករាជ ២៥៦៩ ដោយមាននិស្សិតមកពីក្រុងហ្វឺហ្វី, ក្រុងណានជីង, ក្រុងជឺជាំង, ក្រុងហ៊ូហាន និងនិស្សិតបរទេស ព្រមទាំងសាស្ត្រាចារ្យ និងមន្ត្រីមន្ទីអប់រំខេត្តអានហ៊ួយ សរុប ៧៤រូប។

កម្មវិធីនេះ ធ្វើឡើងក្នុងគោលបំណងរៀបចំទទួលទេវតាឆ្នាំថ្មីព្រះនាមព្រះនាងគោរាគ:ទេវី ជាបុត្រីទី២នៃកបិលមហាព្រហ្ម ទៅតាមទំនៀម តាមប្រពៃណីខ្មែរ។ក្នុងនោះដែរក៏បានផ្សាភ្ជាប់​ទំនាក់ទំនងឱ្យកាន់តែមានភាពស្និតស្នាល សាមគ្គីភាពរវាងនិស្សិតខ្មែរកំពុងសិក្សា​នៅ​តាមបណ្ដាសាកលវិទ្យាល័យនានាក្នុងខេត្តអានហ៊ួយ និងនិស្សិតខ្មែរកំពុងសិក្សានូវតាមបណ្ដាខេត្ត ក្រុង ជុំវិញខេត្តអានហ៊ួយ ប្រកបដោយភាពសប្បាយរីករាយ កក់ក្ដៅ និងស្និលស្នាលជាទីបំផុត។

បន្ថែមពីនេះ កម្មវិធីខាងលើ បានចូលរួមផ្សព្វផ្សាយនូវ​វប្បធម៌ អរិយធម៌ ប្រពៃណីជាតិខ្មែរ និងវិស័យទេសចរណ៍ នៃប្រទេសកម្ពុជាទៅកាន់និស្សិតបរទេសផងដែរ។