សេវាសារព័ត៌មានប្រធានាធិបតី បានរាយការណ៍ថា ប្រធានាធិបតីអ៊ុយក្រែន លោក វ៉្លូឌីមី ហ្សេឡិនស្គី (Volodymyr Zelensky)កាលពីថ្ងៃអង្គារ បានជួបប្រជុំជាមួយអគ្គលេខាធិការអង្គការសន្ធិសញ្ញាអាត្លង់    ទិកខាងជើង (NATO) ដែលកំពុងបំពេញទស្សនកិច្ច លោក Mark Rutte ដើម្បីពិភាក្សាអំពីសន្តិសុខអ៊ុយក្រែន និងអឺរ៉ុប។

នៅក្នុងកិច្ចប្រជុំនៅទីក្រុង Odesa ភាគខាងត្បូងនៃប្រទេសអ៊ុយក្រែន លោក ហ្សេឡិនស្គី និងលោក Rutte បានពិភាក្សាអំពីទម្រង់ផ្សេងៗនៃកិច្ចសហប្រតិបត្តិការរវាងប្រទេសអ៊ុយក្រែន និងរដ្ឋសមាជិកណាតូ។

កិច្ចពិភាក្សានេះ ក៏បានផ្តោតទៅលើទំនាក់ទំនងរបស់អ៊ុយក្រែនជាមួយសហរដ្ឋអាមេរិក និងកិច្ចខិតខំប្រឹងប្រែងរបស់ទីក្រុងវ៉ាស៊ីនតោន ក្នុងការចរចាជាមួយរុស្ស៊ី។

របាយការណ៍ បានឲ្យដឹងថា លោក ហ្សេឡិនស្គី បានចោទប្រកាន់រុស្ស៊ីថា «មិនអើពើនឹងសំណើរបស់សហរដ្ឋអាមេរិកសម្រាប់បទឈប់បាញ់ពេញលេញ» និងបន្តការវាយប្រហាររបស់ខ្លួន លើអ៊ុយក្រែន។

ដោយសង្កត់ធ្ងន់លើតម្រូវការ ក្នុងការពង្រឹងការការពារដែនអាកាសរបស់អ៊ុយក្រែន លោក ហ្សេឡិនស្គី បានសម្តែងក្តីសង្ឃឹមចំពោះការអនុវត្តកិច្ចព្រមព្រៀងទាក់ទងនឹងការការពារដែនអាកាសជាមួយដៃគូនៅអឺរ៉ុប និងសហរដ្ឋអាមេរិក។

លោកក៏បានបញ្ជាក់ផងដែរថា ចក្រភពអង់គ្លេស បារាំង និងប្រទេសផ្សេងទៀតរបស់អង្គការណាតូ កំពុងចាក់គ្រឹះយ៉ាងសកម្មសម្រាប់សន្តិសុខ នៅអ៊ុយក្រែន។

ចំណែកឯលោក Rutte បានបញ្ជាក់ជាថ្មីថា សម្ព័ន្ធភាព នឹងបន្តគាំទ្រអ៊ុយក្រែន។

យោងតាមលោកបានឲ្យដឹងថា ក្នុងរយៈពេលបីខែដំបូងនៃឆ្នាំនេះ រដ្ឋសមាជិកណាតូ បានសន្យាផ្តល់ថវិកាជាង ២០ ពាន់លានអឺរ៉ូ (ប្រហែល ២២.៥ ពាន់លានដុល្លារអាមេរិក) ជាជំនួយសន្តិសុខ ដល់អ៊ុយក្រែនសម្រាប់ឆ្នាំ ២០២៥។