កំពង់ចាម ៖ ពិធី ប្រណាំងគោ ក្របី សេះ របស់អ្នកស្រុកស្រីសន្ធរ មានមនុស្ស ម្នាចូលរួមកម្សាន្តយ៉ាងច្រេីនកុះករ ខណៈ នេះជាទំលៀមទំលាប់របស់អ្នកស្រុក ក្នុងថ្ងៃឡេីងស័ក នៃពិធីបុណ្យចូលឆ្នាំប្រពៃណីជាតិខ្មែរ។

នៅព្រឹក ថ្ងៃទី ១៦ ខែមេសា ឆ្នាំ ២០២៥នេះ គឺជាថ្ងៃទី៣នៃពិធីបុណ្យចូលឆ្នាំប្រពៃណីជាតិខ្មែរ រដ្ឋបាល ស្រុកស្រីសន្ធរ បានបង្កេីតព្រឹត្តិការណ៍ការប្រណាំងក្របី-សេះ-គោ និងរទេះ ដោយមានចូលរួមពីសំណាក់ លោក ប៊ិន ឡាដា អភិបាលនៃគណៈស្រុកស្រីសន្ធរ និង លោក ទុំ ដាំ ប្រធាន ក្រុមប្រឹក្សា ស្រុក និងមន្ត្រីរាជការ បងប្អូនប្រជាពលរដ្ឋ យ៉ាងច្រេីនកុះករ។ ដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ នៅថ្ងៃចូលឆ្នាំទី៣ ថ្ងៃវារៈឡើងស័ក នៅវត្តបារាយណ៍ព្រះជីវីធំ ឃុំបារាយណ៍ ស្រុកស្រីសន្ធរ មានការរៀបចំកម្មវិធីបំបោលក្របី-សេះ-គោ និងរទេះ ដើម្បីថ្វាយដល់ទសបារមីព្រះអង្គបារាយណ៍ព្រះជីវីធំដែលជាទំនៀមទម្លាប់តាំងពីបុរាណកាលមក។ ទន្ទឹមនឹងនេះដែរ បងប្អូនប្រជាពលរដ្ឋ ក្រុមយុវជន ដែលបានចូលរួមកម្សាន្តពិធី ប្រណាំងគោ ក្របី សេះ នេះបានសម្តែងភាពសប្បាយរីករាយ និងសាទរចំពោះអាជ្ញាធរដែលបង្កេីតសប្បាយៗនេះឡេីង ។

ជារៀងរាល់ឆ្នាំក្នុងនាមរដ្ឋបាលឃុំ ក្រោមការជួយជ្រោមជ្រែង និងឧបត្ថម្ភទាំងស្រុងពីវត្តបារាយណ៍ព្រះជីវីធំ តែងតែរៀបចំកម្មវិធីនេះឡើង ហើយប្រជាជនណាមានក្របី សេះ គោ ក៏យកមកបំបោល ពីរឬបីជើងក៏ត្រឡប់ ទៅផ្ទះវិញជាលក្ខណៈបំបោលថ្វាយទសបារមីព្រះអង្គបារាយណ៍ព្រះជីវធំតាមប្រពៃណីដូនតាជារៀងរាល់ឆ្នាំ។ ដោយឡែកឆ្នាំនេះ ដោយមានការចង្អុលបង្ហាញពី ឯកឧត្តម អ៊ុន ចាន់ដា អភិបាល នៃគណៈអភិបាល ខេត្តកំពង់ចាម និងលោក ប៊ិន ឡាដា អភិបាល នៃគណៈអភិបាលស្រុកស្រីសន្ធរ ឲ្យរដ្ឋបាលឃុំបារាយណ៍ សហការជាមួយវត្តរៀបចំកម្មវិធីបំបោលក្របី-សេះ-គោ និងរទេះ នេះឡើងដើម្បីញ៉ាំងកម្មវិធីនេះឱ្យមានភាព។

គូសបញ្ជាក់ ថា ក្នុងឆ្នាំនេះការប្រណាំងក្របី-សេះ-គោ និងរទេះចូលរួម៖ក្របីមាន១០គូរ,សេះ៥គូរ , រទេះក្របី៣គូរ និងរទេះសេះបីគូរ សរុបក្របីមាន ២៨ក្បាល សេះ១៣ និងគោ៤ក្បាល៕