ក្រុមបាតុករប្រឆាំងរដ្ឋាភិបាលរាប់រយនាក់ នៅក្នុងទីក្រុងបែលក្រាដ ( Belgrade) បានប្រមូលផ្តុំគ្នា នៅមុខអគារទូរទស្សន៍រដ្ឋ (RTS) កាលពីថ្ងៃអង្គារ (ទី១៥ ខែមេសា) ដោយខឹងសម្បាចំពោះការរាយការណ៍របស់ទូរទស្សន៍រដ្ឋស្តីពីគ្រោះមហន្តរាយស្ថានីយរថភ្លើង កាលពីខែវិច្ឆិកា។

ក្រុមអ្នកតវ៉ាបានផ្លុំកញ្ចែ ស្រែកពាក្យស្លោក និងឈរស្ងៀម នៅមុខអគារទូរទស្សន៍ RTS រយៈពេល ១៦នាទី ដើម្បីរំលឹកដល់ជនរងគ្រោះនៃការបាក់ដំបូលស្ថានីយរថភ្លើង ដែលពួកគេ បានស្តីបន្ទោសអាជ្ញាធរស៊ែប៊ី។

ការតវ៉ានេះ ត្រូវបានរៀបចំឡើងដោយក្រុមនិស្សិត ដែលទាមទារឲ្យអ្នកទទួលខុសត្រូវទៅលើការបាក់ដំបូលដែលបានបណ្តាលឲ្យមនុស្សរាប់សិបនាក់ស្លាប់ ត្រូវបាននាំយកមកកាត់ទោស។

ការតវ៉ាប្រចាំថ្ងៃរយៈពេល ៥ខែ បានធ្វើឲ្យសិស្ស គ្រូបង្រៀន កសិករ និងអ្នកផ្សេងទៀត ក្លាយជាការគំរាមកំហែងដ៏ធំបំផុតចំពោះការគ្រប់គ្រងរយៈពេលមួយទសវត្សរ៍របស់លោកប្រធានាធិបតី Aleksandar   Vucic។

ប្រជាជនស៊ែប៊ីជាច្រើន បានចាត់ទុកគ្រោះមហន្តរាយស្ថានីយរថភ្លើង នៅខែវិច្ឆិកាថា ជាអំពើពុករលួយដែលមិនអាចទប់ស្កាតបាន ដោយពួកគេបានភ្ជាប់ជាមួយលោក Vucic និងគណបក្សវឌ្ឍនភាពស៊ែប៊ី ដែលកំពុងកាន់អំណាចរបស់លោក។