អគ្គលេខាធិការនៃអង្គការសន្ធិសញ្ញាអាត្លង់តិកខាងជើង ឬអង្គការណាតូ (NATO) កាលពីថ្ងៃអង្គារ (ទី១៥ ខែមេសា) បានលើកឡើងថា ការគាំទ្ររបស់សម្ព័ន្ធមិត្តយោធាមួយនេះ ចំពោះអ៊ុយក្រែន នៅតែ «មិនផ្លាស់ប្តូរ» នោះឡើយ ដោយសង្កត់ធ្ងន់ថា ជំនួយសន្តិសុខច្រើនជាង ២០ពាន់លានអឺរ៉ូ (ជាង ២២ពាន់លានដុល្លារ) ត្រូវបានសន្យាផ្ដល់ឲ្យរួចហើយ ក្នុងរយៈពេល ៣ខែដំបូងនៃឆ្នាំនេះ។

លោក Mark Rutte បាននិយាយបែបនេះនៅឯទីក្រុងកំពង់ផែ Odesa របស់ប្រទេសអ៊ុយក្រែន ជាកន្លែងដែលលោកបានជួបជាមួយប្រធានាធិបតី លោក Volodymyr Zelenskyy។ ដំណើរទស្សនកិច្ចរបស់លោកបានកើតឡើងប៉ុន្មានថ្ងៃបន្ទាប់ពីមីស៊ីលបាលីស្ទិករបស់រុស្ស៊ី ២គ្រាប់ បានវាយប្រហារទីក្រុង Sumy កាលពីព្រឹកថ្ងៃអាទិត្យ ដោយបានសម្លាប់មនុស្សយ៉ាងហោចណាស់ ៣៥នាក់ ក្នុងនោះមានកុមារ ២នាក់ផងដែរ និងរបួស ១១៩នាក់។

គួរបញ្ជាក់ថា ការវាយប្រហារលើទីក្រុងភាគឦសានដែលមានចម្ងាយប្រហែល ៣០គីឡូម៉ែត្រ ពីព្រំដែនអ៊ុយក្រែនជាមួយរុស្ស៊ី បានក្លាយជាការវាយប្រហារទ្រង់ទ្រាយធំលើកទី២ ក្នុងរយៈពេលត្រឹមតែជាងមួយសប្តាហ៍ប៉ុណ្ណោះ ដែលបណ្តាលឲ្យមានជនស៊ីវិលបាត់បង់ជីវិតយ៉ាងច្រើន។ កាលពីដើមខែនេះ មនុស្សប្រមាណជា ២០នាក់ ត្រូវបានសម្លាប់ ក្នុងនោះមានកុមារ ៩នាក់ផងដែរ បន្ទាប់ពីមីស៊ីលបាលីស្ទិករបស់រុស្ស៊ី បានវាយប្រហារទីក្រុង Kryvyi Rih ដែលជាស្រុកកំណើតរបស់លោក Zelenskyy កាលពីថ្ងៃទី៤ ខែមេសា។

អំឡុងសន្និសីទសារព័ត៌មានរួមជាមួយលោក Zelenskyy លោក Rutte បានបញ្ជាក់ថា៖ «ខ្ញុំមកទីនេះ ថ្ងៃនេះ ព្រោះខ្ញុំជឿថា ប្រជាជនអ៊ុយក្រែនសមនឹងទទួលបានសន្តិភាព សុវត្ថិភាព និងសន្តិសុខពិតប្រាកដ ក្នុងប្រទេសរបស់ពួកគេ ក្នុងគេហដ្ឋានរបស់ពួកគេ»។ 

មេដឹកនាំទាំង២ ក៏បានទៅជួបសួរសុខទុក្ខទាហានអ៊ុយក្រែនដែលរងរបួសនៅមន្ទីរពេទ្យ ក្នុងទីក្រុង Odesa ផងដែរ។ នេះជាដំណើរលើកដំបូងរបស់លោក Rutte ទៅកាន់អ៊ុយក្រែន គិតចាប់តាំងពីប្រធានាធិបតីអាមេរិក លោក Donald Trump បានដឹកនាំការចរចាបទឈប់បាញ់ រវាងទីក្រុងគីវ និងទីក្រុងមូស្គូ ដែលរួមមានទាំងការចរចាជាច្រើនលើក នៅក្នុងប្រទេសអារ៉ាប៊ីសាអ៊ូឌីតផងដែរ៕