អង្គភាពពិសេសរបស់កងទ័ពលីបង់កាលពីថ្ងៃអង្គារ បានធ្វើប្រតិបត្តិការមួយ នៅទីក្រុង Saida ភាគខាងត្បូង ដោយឃាត់ខ្លួនសមាជិកជាន់ខ្ពស់ពីរនាក់នៃចលនាបដិវត្តន៍ប៉ាឡេស្ទីនហាម៉ាស។ នេះបើយោងតាមគេហទំព័រព័ត៌មាន Janoubia។

អត្តសញ្ញាណរបស់ជនជាប់ឃុំ មិនត្រូវបានគេបង្ហាញឲ្យដឹងឡើយ។

យោងតាមគេហទំព័រព័ត៌មាននេះ បានឲ្យដឹងថា នេះមិនមែនជាករណីដំបូង ដែលឥស្សរជនប៉ាឡេស្ទីនដែលត្រូវបានចាប់ខ្លួន ពាក់ព័ន្ធនឹងការវាយប្រហារប្រដាប់អាវុធ ប្រឆាំងនឹងអ៊ីស្រាអែល ដែលបានចាប់ផ្តើមពីទឹកដីលីបង់ ភាគខាងត្បូង។ នាពេលមុននេះ កងកម្លាំងប្រដាប់អាវុធលីបង់ បានបិទមូលដ្ឋានយោធាចំនួន ៦ ដែលជាកម្មសិទ្ធិរបស់ក្រុមប្រឆាំងប៉ាឡេស្ទីន នៅក្នុងជ្រលងភ្នំ Beqaa និងតាមបណ្តោយព្រំដែនស៊ីរី ដោយរឹបអូសយកឧបករណ៍ និងគ្រាប់រំសេវដែលរក្សាទុក នៅទីតាំងទាំងនោះ។

ប្រតិបត្តិការនេះ បានកើតឡើង ចំពេលមានការកើនឡើងភាពតានតឹងក្នុងតំបន់។ កាលពីថ្ងៃទី ០៤ ខែមេសា ការវាយប្រហាររបស់កងទ័ពអាកាសអ៊ីស្រាអែល បានកំណត់គោលដៅទៅលើទីក្រុង Saida ដោយបានសម្លាប់លោក Hassan Farhat ដែលជាមេបញ្ជាការក្រុមហាម៉ាស នៅភាគខាងត្បូងប្រទេសលីបង់។ កាលពីដើមឆ្នាំនេះ នៅថ្ងៃទី ០២ ខែមករា លោក Saleh al-Arouri អនុប្រធានការិយាល័យនយោបាយរបស់ក្រុមហាម៉ាស ត្រូវបានសម្លាប់ នៅក្នុងការវាយប្រហារដោយយានដ្រូនរបស់អ៊ីស្រាអែល នៅជាយក្រុងបេរូតភាគខាងត្បូង។ 

បច្ចុប្បន្ននេះ ប្រទេសលីបង់ មានជំរំជនភៀសខ្លួនប៉ាឡេស្ទីនចំនួន ១២ ដែលប្រតិបត្តិការក្រោមស្វ័យភាពផ្ទៃក្នុង ដោយមានប្រជាជនប៉ាឡេស្ទីនប្រហែល ៤៥០.000នាក់។