មីយ៉ាន់ម៉ា៖ យោងតាមសារព័ត៌មានក្នុងស្រុកដោយសំអាងប្រភពពីក្រុមអ្នកតវ៉ា និងអ្នកឈរមើលហេតុការណ៍ឲ្យដឹងថា មានមនុស្សយ៉ាងហោចណាស់ ៥នាក់បានស្លាប់នៅពេលរថយន្តយោធា ១គ្រឿងរបស់ទាហានមីយ៉ាន់ម៉ាបានបើកបំបុកចូលហ្វូងអ្នកតវ៉ាប្រឆាំងរបបយោធាកាលពីចុងសប្ដាហ៍នេះ។
អ្នកសារព័ត៌មានម្នាក់ដែលបានឃើញឧបទ្ទវហេតុនេះបានប្រាប់ទូរទស្សន៍ CNN ថា គឺជារថយន្តយោធា ដែលបានបើកបំបុកចូលទៅក្នុងក្រុមបាតុករ។ យោងតាមសេចក្ដីថ្លែងការណ៍ចេញដោយយោធាមីយ៉ាន់ម៉ា អ្នកតវ៉ាចំនួន ១១នាក់ត្រូវបានចាប់ខ្លួននៅកន្លែងកើតហេតុ រួមទាំងបុរស ២នាក់ និងស្ត្រីម្នាក់ ដែលបានរងរបួស។ ប៉ុន្តែសេចក្ដីថ្លែងការណ៍នោះមិនបានទទួលស្គាល់របាយការណ៍ដែលថាមានមនុស្សស្លាប់ ឬការចោទប្រកាន់ថា បានវាយប្រហារដោយរថយន្តនោះទេ។
អង្គការសហប្រជាជាតិនៅក្នុងសហភាពមីយ៉ាន់ម៉ា បានថ្កោលទោសឧបទ្ទវហេតុនេះ ដោយចេញសេចក្ដីថ្លែងការណ៍រិះគន់ការវាយប្រហារដែលត្រូវបានរាយការណ៍ លើក្រុមជនស៊ីវិលគ្មានអាវុធក្នុងដៃជាច្រើននៅទីប្រជុំជន Kyimyindaing ក្នុងទីក្រុង Yangon ដែលរថយន្តរបស់កងកម្លាំងសន្តិសុខបានបើកបំបុកក្នុងហ្វូងអ្នកតវ៉ា ដែលក្រោយមកបានបាញ់រះដោយកាំភ្លើងគ្រាប់ពិតបណ្ដាលឲ្យមានមនុស្សជាច្រើនត្រូវស្លាប់ និងរបួស៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
