នៅក្នុងបទសម្ភាសន៍មួយដែលត្រូវបានចាក់ផ្សាយ កាលពីថ្ងៃអង្គារ (ទី១៥ ខែមេសា) ប្រធានាធិបតីអាមេរិក លោក Donald Trump បាននិយាយថា លោកគ្រោងនឹងដាក់ចេញនូវកម្មវិធីថ្មីមួយដែលផ្តល់ប្រាក់ដល់ជនអន្តោប្រវេសន៍ខុសច្បាប់ ដែលព្រមចាកចេញពីប្រទេសដោយស្ម័គ្រចិត្ត។

លោក Trump បានប្រាប់ថា «កម្មវិធីព្រមនិរទេសខ្លួនឯង» បែបនេះ នឹងរួមបញ្ចូលជំនួយហិរញ្ញវត្ថុមួយចំនួន និងការរំពឹងទុកពីការបានចូលប្រទេសឡើងវិញដោយស្របច្បាប់ នាពេលក្រោយ។ បើយោងតាមប្រតិចារិកផ្លូវការនៃបទសម្ភាសន៍ដែលបានថតទុកកាលពីថ្ងៃចន្ទ លោក Trump បានប្រាប់ពិធីការិនី Rachel Campos-Duffy របស់ប្រព័ន្ធផ្សព្វផ្សាយ Fox Noticias ថា៖ «យើងនឹងផ្តល់ឲ្យពួកគេនូវប្រាក់ឧបត្ថម្ភ»។

លោកបានបញ្ជាក់បន្ថែមថា៖ «យើងនឹងផ្តល់ប្រាក់ខ្លះ និងសំបុត្រយន្តហោះឲ្យពួកគេ ហើយបន្ទាប់មកយើងនឹងធ្វើការជាមួយពួកគេ។ ប្រសិនបើពួកគេជាបុគ្គលល្អត្រឹមត្រូវ ប្រសិនបើយើងចង់ឲ្យពួកគេចូលមកវិញ យើងនឹងធ្វើការជាមួយពួកគេ ដើម្បីឲ្យពួកគេត្រលប់មកវិញយ៉ាងឆាប់តាមដែលយើងអាចធ្វើបាន»។

អ្នកនាំពាក្យសេតវិមាន បាននិយាយថា លោកគ្មានអ្វីត្រូវបន្ថែម ជុំវិញការអត្ថាធិប្បាយរបស់លោក Trump នោះទេ។ លោក Trump ដែលជាមេដឹកនាំទៅពីគណបក្សសាធារណរដ្ឋ បានប្តេជ្ញានិរទេសក្នុងចំនួនដ៏ច្រើនបំផុតនៃជនអន្តោប្រវេសន៍ដែលរស់នៅសហរដ្ឋអាមេរិកដោយខុសច្បាប់ ហើយបានសាកល្បងអនុវត្តច្បាប់របស់សហរដ្ឋអាមេរិក ដើម្បីបង្កើនការចាប់ខ្លួន និងការនិរទេស៕