មេធាវីរបស់លោក បានប្រាប់ទីភ្នាក់ងារសារព័ត៌មាន AFP ថា នាយកមន្ទីរពេទ្យ Kamal Adwan នៃតំបន់ហ្កាហ្សា ដែលត្រូវបានចាប់ខ្លួន ដោយកងកម្លាំងអ៊ីស្រាអែលកាលពីខែធ្នូ កំពុងត្រូវបានឃុំខ្លួន ក្នុងលក្ខខណ្ឌ «អមនុស្សធម៌» ដោយអ៊ីស្រាអែល ហើយទទួលរងនូវ «ការបំភិតបំភ័យផ្នែករាងកាយ និងផ្លូវចិត្ត»។ 

លោក Hussam Abu Safiya គ្រូពេទ្យកុមារអាយុ ៥២ឆ្នាំ បានឡើងល្បីល្បាញកាលពីឆ្នាំមុន ដោយការបង្ហោះអំពីស្ថានភាពធ្ងន់ធ្ងរ នៅក្នុងមន្ទីរពេទ្យដែលត្រូវបានឡោមព័ទ្ធរបស់លោក នៅក្នុងទីក្រុង Beit Lahia អំឡុងពេលការវាយលុកទ្រង់ទ្រាយធំរបស់អ៊ីស្រាអែល។

នៅថ្ងៃទី ២៧ ខែធ្នូ កងកម្លាំងអ៊ីស្រាអែល បានចាប់ផ្តើមការវាយលុកទៅលើកន្លែង ដែលពួកគេដាក់ស្លាកថា ជា«មជ្ឈមណ្ឌលភេរវកម្មហាម៉ាស ហើយបានចាប់ខ្លួនបុគ្គលិកពេទ្យរាប់សិបនាក់ រួមទាំងលោក Abu Safiya ផងដែរ។

មេធាវីរបស់លោក Abu Safiya គឺលោក Gheed Qassem អាចទៅជួបលោកគ្រូពេទ្យនេះ នៅថ្ងៃទី ១៩ ខែមីនា នៅក្នុងពន្ធនាគារ Ofer នៅតំបន់វេសបែង( West Bank)។

លោក Qassem ដែលបានជួបអ្នកឆ្លើយឆ្លងព័ត៌មាន AFP នៅទីក្រុង Nazareth បាននិយាយថា៖«លោកគ្រូពេទ្យ កំពុងរងទុក្ខយ៉ាងខ្លាំង លោកហត់នឿយពីការធ្វើទារុណកម្ម សម្ពាធ និងការអាម៉ាសដែលលោក បានស៊ូទ្រាំ ដើម្បីបង្ខំលោកសារភាពចំពោះទង្វើ ដែលលោកមិនបានប្រព្រឹត្ត»។